قول يااااارب

justdraem

2011-04-16T02:07:00.004+02:00

I dream of rain
I dream of gardens in the desert sand
I wake in vain
I dream of love as time runs through my hand

أريد الرحيل ...لأرض المحبه..لأرض التسامح..لأرض العداله

2011-03-18T00:56:00.004+02:00

أُريدُ الرحيلَ
لأرضٍ جَديدة
لأرضٍ بَعيدة
لأرضٍ وما أدرَكَتْها العُيونُ
ولا دَنَّستْها ذُنوبُ البشَرْ
أُريدُ التَّنقُّلَ بينَ الكواكِب
يومًا أُسافرُ بينَ النجوم
ويومًا أنامُ بِحِضنِ القمرْ
وحينًا أُغني كمثلِ الطيورِ
وحينًا أُظلِّلُ مثلَ الشجرْ
أُريدُ الرحيلَ لأرضِ المحبَّةِ
أرضِ التسامُحِ
أرضِ السلامِ لكلِّ البشرْ
أُريدُ الرحيلَ لأرضِ الفضيلةْ
لأنَّ الحياةَ هُنا مُستحيلةْ
لأنَّ الرذيلةْ ..
تُحطِّمُ فينا الصفاتِ النبيلةْ
وتَحرِقُ كلَّ المعاني الجميلةْ
فيا أرضُ أحمِلُها مثلَ عُمري
وأرحَلُ عَبرَ السنينِ الطويلةْ
فأينَ الطريقُ المؤدي إليكِ ؟
وكيفَ الوصولُ ؟
وأينَ الوسيلةْ ؟
أُريدُ الرحيلَ لأرضِ العدالةْ
فكلُّ الحقوقِ لَدينا تَضيعُ
ونحنُ نَعيشُ بعصرِ الجَهالةْ
قَتلنا الرسولَ ،
حَرقنا الرسالةْ
فكيفَ الحياةُ على ظَهرِ أرضٍ
تُخلِّفُ فينا عُصورَ الضلالَةْ
أُحبُّكِ يا أرضُ لَمْ تأتِ بَعدُ
ورَغمَ انتِظاري
أنا ما شَعُرتُ بطعمِ المَلالةْ
ستَبقينَ حُلم
ولو كنتُ أُدرِك
أنَّ الوصولَ إليكِ استِحالةْ

محدش شاف مصر؟مصر تاهت من ايدينا

2011-03-16T02:08:00.002+02:00

أسعد الله مساءكم جيل الثوره
والله مش عارفه اتكلم فى ايه ولا ايه ولا ايه ماشاء الله الخيرات بتتحدف على مصر من كل حدب وصوب .كنا دايما بنقول يارب افرجها علينا .اهى فرجت على الاخر ومش ملاحقين والله .انا بدايه احب اشير الى انه انا لما كتبت خطاب الى سيادة الرئيس المتنحى عمرى ماكنت اتخيل انه هيوصله بالسرعه دى البوسطه عندنا طلعت اسرع من المطافى بكتير .كان فعلا كلام عادى من زهق وغيظ الشعب لكن مكنتش اتخيل ان ممكن الثورة تقوم واحنا عايشين يلا عشنا وشفنا ثورة فى بلدنا.المهم ندخل فى الموضوع على طول ولو ان مكنتش حابه اتكلم فيه حاجه لانه احيانا الصمت بيكون ابلغ كلام فى اوقات معينه.لكن لما طرح موضوع التعديلات الدستوريه قلت استوب بقى لحد هنا وكل واحد يتكلم فى اللى يخصه.اولا انا حابه تشوفوا الكلام الجاى ده واللى عثرت عليه من الشبكه العنكبوتيه يعنى كلام مش من عندى ولا حاجه وتقولوا رايكم فيه
***

مباديء ثورة يوليو
1. القضاء على الاقطاع.
2. القضاء على الاستعمار.
3. القضاء على سيطرة رأس المال على الحكم.
4. إقامة حياة ديمقراطية سليمة.
5. إقامة جيش وطني قوي.
6. إقامة عدالة إجتماعية

الاخفاقات
تبنت الثورة في ايامها الأولى مبادىء رائعة..إنسانية.. براقة.. وطنية.. عدالة ومساواة وكرامة.. ولتجميل وجه الثورة جاءوا باللواء محمد نجيب رحمة الله عليه وتحالفوا مع الاخوان المسلمين.. وذلك لتحسين المظهر العام ولاظهار "ان فئات الشعب المختلفة موجودة فى قلب رجالات الثورة" واتجهوا إلى صناع السينما الفتية وصنعوا افلاما إساءات للملك فاروق، اساؤا فيها كثيراً وبها كثيرُ من المبالغات والمغالطات، وللاسف اثبتت الايام والسنوات ان حكم هذا الملك ورجالاته بكل فسادهم افضل بكثير من وعود الثورة وتبعاتها كما يلى: 1- قلب المجتمع المصري راسا على عقب وتاليب الطبقات على بعضها. 2-تنمية الاحقاد بين طبقات الشعب. 3-الاستيلاء على اموال الناس العصاميين وتهريب كنوزهم وكنوز البلد إلى جيوب ضباط الثورة بما فيهم اصاغر الرتب فيها. 4-اتلاف المصانع وايقاف عجلة التنمية الفعلية وتاميم القلاع الصناعية، وانظروا إلى ماذا وصلت أحوالها تدريجيا إلى اليوم. 5-ظهور صناعة الفساد في السينما وانحدار القيم وتكريس الفساد والانحلال ولنقارن بين سينما الاربعينات مثلا وسينما الستينات والسبعينات وحتى اليوم. 6- تدمير قدرات الجيش المصري وادخاله في مغامرات عسكرية صبيانية هنا وهناك دون داع أو عائد. 7-هزائم عسكرية متلاحقة واخفاء للحقائق. 8- صفقات سلاح فاسدة حقيقية لاتقارن بايام الملك وعمولات لا تصدق بارقام فلكية. 9- تدمير الإنسان المصري تماما نفسيا وعقديا وافقار الشعب إلى حدود لم يتصورها احد لا في الاربعينات ولا في الخمسينات. 10- اخفاق في شتى المجالات الحياتية وانعدام الإنتاج الحقيقى تماما. 11- التبعية الكاملة للجانب الغربي الامريكى وفقدان لصنع القرار. 12- فشل في السياسة الزراعية وفشل سياسة الخمس فدادين. 13- تدهور سعر صرف الجنيه المصري امام كافة العملات...اعتبارا من الفترة التي اتخذ فيها قرار بيع الغطاء الذهبى للجنيه المصري. 14- فقدان الإنسان المصري لجانب كبير من كرامته داخل بلده وخارجه حتى في أقل الدول منا. 15- انحدار التعليم والرياضة والصحة والاقتصاد والامن والاخلاق والتحضر.. إلى اخره. 16- لم يتم تحقيق أي مبدء من مبادىء الثورة وحتى التاميم وتوزيع الثروة، وقد اعيد النظر فيها مرة أخرى في العقود الأخيرة ليتم توزيع ما تم نهبه من الامراء والاعيان وما ورثوه عن اهاليهم بعرقهم ليوزع على زمرة من المنتفعين هنا وهناك وليتم خصخصة المؤسسات الوطنية العملاقة من جديد لتسليمها لمستثمرون اجانب مرة أخرى كما كان الحال ايام الاحتلال الانجليزى ولكن هذه المرة بيعت بابخس الاسعار. 17-أصبحت الصناعات الثقيلة من ذكريات التاريخ واستبدلت بمصانع للشيبسى والشوكولا والسكاكر والمكياجات الرديئة والمياه الغازية العفنة...
دى بقى مبادىء واخفاقات ثورة يوليو 1954 انا مش بحب اتكلم فى اللى فات الا اذا كان اللى فات هنتعلم منه وبيجى ليه وقت ولازم نشوفه ونفكر فيه تانى بفكر اكثر وعيا ونضجا
المشكله فين بالظبط ,الاول كان فيه مبادىء جميله وبريئه والشعب كله موافق عليها وبشده لكن ايه اللى بيحصل بعد كده ؟؟؟اعتقد انه فيه اسباب كتير ممكن تكون سبب فى فشل اى ثورة ...لكن من خلال نظرتى المتواضعه واللى ممكن جدا اكون مخطئه فيها انه السبب فينا احنا كشعب من خلال سلوكياتنا وتصرفاتنا واهدافنا يعنى دلوقتى الكل بيطالب بمزيد من الحريه والديمقراطيه وطبعا انا معاكم لكن علشان يبقى فيه مزيد من الديمقراطيه يبقى اصلا فيه مزيد من الاستقرار متبقاش البلد بتقع فوق دماغنا ونقول مزيد من الديمقراطيه .ديمقراطيه ايه ده شويه ومش هنلاقى الشعب .تقريبا ان الثوره على ماتدلو بدلوها هيكون الشعب خلص ومش هنلاقى حد تحكمه الديمقراطيه
نخرج من الموضوع اللطيف ده ندخل على موضوع الذ خالص الا وهو التعديلات الدستوريه اللى زهقونا بيها ,طبعا مش عاوزة اقولكم كل مكان فى المنصورة دلوقتى فيه يافطه مكتوب عليها لا للتعديلات الدستوريه وبعديها بخطوتين واحده تانيه عليها نعم للتعديلات,ومنشورات بتتوزع وحاجه عنب والله
انا طبعا من الشعب والى الشعب محتاره ودماغى ضربت خلصنا من الاعلانات بتاع زمان جالنا التعديلات وطبعا انتوا عارفين البلد اللى من غير دستور زى معمر من غير توكتوك .فقلت اروح الندوه اللى عملوها فى نادى المحامين يمكن نقتنع بشىء وطبعا انا مهما حكيت من هنا ليوم التعديلات مش هقدر اوصف اللى شفته حقيقى شىء يدعو الى الضحك بهستريا لدرجه انه ممكن تفضل تضحك اربع ساعات من غير ماتفصل ولا تلاجه توشيبا
المهم انا طبعا زى ماروحت زى ماجيت رايى متغيرش كتير لكن مقدرش انكر طبعا ان كان فيه كلام كويس جدا بيتقال لكن تعليقى كان على سلوكيات .وانا هظل مقتنعه انه ولا مائه ثورة هتغير بلد لو الشعب مغيرش سلوكياته وكفايه بقى نفسى احس بالرقى والتحضر فى حاجات كتير تنقصنا.يعنى انا النهارده واحنا ف الندوه بجد حسيت اننا فى قهوه ومش عاوزة اقول كلمه تانيه تلاقى كل واحد قاعد فى ايده سيجاره ولا اللى بيبخروا المكان وواحد بيقرأ الجرنال وواحد بيشرب قهوته وحسسونى ان كل واحد قاعد فى بلكونه بيتهم بيشوف اخبار البلد .مع احترامى طبعا للساده الحاضرين لكن حقيقى لم يكن بالسلوك اللى كنت اتمنى اشوفهم عليه واللى كنت راحه ومتخيله انه حاجه هنتلكم فى مستقبل وطن مش رايحين نعرف مين اللى اكل الجبنه؟
المهم خلونا فى مستقبل بلدنا بالنسبه للتعديلات عليكم بقى تسمعوا دكاتره القانون الدستورى واللى اكدوا ان الدستور سقط اصلا من زمان .لكن مايدعو الى الاندهاش طالما هو سقط من فتره امال كنتوا طلبتوا من الاول ليه بالتعديل الدستورى ولا الناس اللى راحت عدلت دى صحيت من النوم قالت يلا نروح نعدل مواد الدستور ولا احنا لازم مش بنفوق غير بعد الهنا بسنه.انا لا انكر ان بعض التعديلات فيها مالايرضى الجميع لكن البعض يرى بان نقول نعم ليس نعم على الدستور بذاته ولكن من وجهة نظرهم ان هذا هو ماسيؤدى الى الاستقرار اللى بقى حلمنا كلنا .لكن ارجع وااقول مش علشان عاوزين استقرار نهبل الدنيا فى بعضها واروح اعدل فى دستور هو سقط بالفعل ومابنى على باطل فهو باطل
والبعض يتسائل ماهو الحل اذن؟؟الحل بسيط ولذيذ كان ممكن يعملوا دستور مؤقت او اعلان .ورقه فيها بعض المواد اللى تقدر تسير البلد الى ان يتولاها احد الاشخاص وخلصت
اتمنى بجد نبطل تعقيد الامور وهو حلها ابسط مما يكون .اتمنى اننا نقف لحظه ونفكر صح ونشوف احنا عاوزين ايه وتكون اهدافنا محدده مش كل لما يتنفذ شىء نقول ابدا ولا يمكن ومش هلعب معاكم ..هدوووووووووء ياشباب
كنا زمان بنقول اننا زهقنا من البلد ومن الوضع وعاوزين نهاجر دلوقتى اعتقد ان البلد هيا اللى زهقت مننا ومن اللى فيها وهيا المره دى اللى هتمشى وتسيبهالنا مخضره يمكن تطرح مكرونه
اسفه على الاطاله انا شخصيا بتخنق جدا من المقالات الطويله لكن اعذرونى ده صمت سنوات سابقه

مصر يما يا سفينة

مصر ياما يا بهيه
يا ام طرحه وجلابيه
الزمن شاب وانتي شابه
هوا رايح وانتي جايه
جايه فوق الصعب ماشيه
فات عليكي ليل وميه
واحتمالك هوا هوا
وابتسامتك هيا هيا
تضحكي للصبح يصبح
بعد ليله ومغربيه
تطلع الشمس تلاقيكي
معجبانيه وصبيه
يا بهيه

لو حد شاف مصر قولولها ارجعلنا يابهيه ياجميله ياام شمس طابعه فينا

Do Not Disturb

2011-01-02T00:33:00.004+02:00

I discovered that life in dreams is much better than the reality so I decided to live in my dreams

خطاب الى سيادة الرئيس

2010-12-21T23:15:00.002+02:00

مساء الشاى بالياسمين ونحلى بشوية تزوير على عيون الجماهير
اولا بجد بيوحشنى جدا الكتابه فى المدونه ومابيمنعنى عنها الا الشديد.المهم ياجماعة انا بجد كان نفسى جدا اكتب قبل الانتخابات والبنتجان اللى حصل ده واطلب منكم المقاطعه بس المشكله ان بجد مكنتش فاضيه ومكنش فيه وقت ادخل نت كنت عامله فيها بيزنس مان ,المهم قلت اسيب الموضوع لحد مااشوف هيوصل لفين ويارتنى مااستنيت اكيد المقاطعه كانت هنبقى افضل بكتير من اللى حصل.
طبعا الكل اكيد مستغرب من اسم البوست وبيقول عليا اتجننت ده اذا مكنتش بقيت كده فعلا هههه بعد نتيجة الانتخابات والحاجات اللذيذه اللى حصلت فيها (بجد حاجه تموت من الضحك)و قلت امشى على نهج احمد حلمى ف فيلمه واكتب جواب لسياده الريس محدش عالم يمكن يتغير بالخطاب شىء ولو انه معتقدش بس اهى محاوله قد تبوء بالنجاح (هههه حلوه تبوء دى)
المهم قبل مااعلق على الصوره الفظييييعه اللى فوق دى واللى استوليت عليها من الفيسبوك وكنت بقولهم لو فيه قصب فى المجلس اكيد هنزل الانتخابات الجايه ,انا اللى مخوفنى اننا ممكن نلاقى فى اخر بنش ف المجلس حد بينادى ويقول الفريسكا وواحد يقول صميد وجبنه وعجويستا هههههه ومش بعيد نلاقى كاظم داخل بيغنى ويقول فرشت رمل البحر ونامت واتغطت بالقبه وطبعا فيه بحر ورمل وشط المجلس مش هييبقى له مثيل(ولا عزاء للمجالس)

نتكلم جد شويه ياشموع المستقبل, اللى مش باين له اى لون ,المفروض ان كلنا او اغلبنا عارف اختصاصات مجلس الشعب بس نقولها تانى علشان الحبايب وهى كما جاءت فى الكاستور (قصدى الدستور)

يباشر مجلس الشعب بوصفه السلطة التشريعية اختصاصات مختلفة ورد النص عليها فى الباب الخامس من الدستور، فوفقا للمادة 86 وما بعدها يتولى المجلس :
• التشريع
• إقرار المعاهدات و الاتفاقات
• إقرار الخطة و الموازنة
• الرقابة على أعمال السلطة التنفيذية
• مناقشة بيان رئيس الجمهورية
• تعديل الدستور
إقرار إعلان حالتى الحرب و الطوارىء
طبعا بعد ماالستات احتلوا المجلس كان المفروض تبقى اختصاصات المجلس مختلفه يعنى مثلا التشريع يكون فيه مشروعات قوانين وفن الطبخ وعمل الكيك ههه
اما اقرار الاتفاقيات فدى هتكون بين النواب والنائبات علشان ميحصلش مشاكل تحت القبه وكل واحد يطلب بالمساواه فنفض الخلاف من دلوقتى ويبرموا احلى اتفاقيات
اما بقى اقرار الموازنه والخطه فبصراحه الستات متتوصاش بالموضوع ده (ده هما اساتذه تخطيط ههههه)
وعلى هذا النهج تسير اختصاصات المجلس (وعوضنا على الله)
بسم الله الرحمن الرحيم ,الى رئيس الجمهوريه ,اكتب لسيادتكم هذا الخطاب وكلى حزن واستياء لما حدث فى بلادنا ,ياريس الشعب خلالالالالاص فاض بيه ومش بعيد يقوم بثورة ,ياريس لو يرضيك ان الموجودين فى الصورة دول هما اللى هيشرعوا قوانين وهما اللى هيبرموا اتفاقيات وهما اللى هيخططوا يبقى اللى سيادتك شايفه ياريس...
لو سيادتك شايف ان دول هما اللى هيقروا بحاله طوارىء او حرب يبقى اللى سيادتك شايفه ياريس....
ياريس الشعب على اد مابيحب وطنه بجد بس ممكن يشتغلوا جواسيس قريب من اللى فيهم ياريس
ياريس لو سيادتك نزلت مش هقول فى بلدنا بس خلينا حتى فى شوارع وحوارى القاهره هتلاقى الشعب بيكمل عشاه نوم ده لو لقى فطار اصلا
ياريس الشعب خلص والامراض مسكته من الهم ده لولا انه شعب مضحك ومرح كان مات من الغيظ من زمان ياريس
ياريس ياريت تشوفلنا حل فى اللى بيحصل (على راى القرموطى معلش احنا بنتبهدل ياريس)
ياريس انا بطالب بتعديل المادتين 86,87 ,انا عارفه ان الدستور بتاعنا عاوز قرار ازاله من زمان بس بنحاول نرمم فيه اى شىء بدل مايقع فوق دماغنا وتخرب البلد خالص ونبقى زى المانيا بعد الحرب العالميه (خرااااااااااااااب)
واخيرا ياريس بالاصاله عن نفسى وبالنيابه عن الشعب المحبوب (طبعا انا عارفه ان الشعب وقت الضرب هيقولوا احنا ولا نعرفها هههه) احنا بجد بنحب تراب البلد مش البلد بس وبجد بجد نفسنا نشوفها من احلى واجمل البلاد قبل مانموت ياريس .ياريس لويرضيك اللى بيحصلنا يبقى اللى سيادتك شايفه ياريس....
وشكرا لسعة صدوركم

تنويه هام لاصدقائى المدونين ياريت تبعتولى التعليقات مش هنا لانه طبيعى بعد ماانزل البوست هكون مشرفه يااما سجن الاستاد وده يبقى من فضل الله علشان ابقى قريبه من الناس اللى هيزورونى ويااما هتنفى لحلايب وشلاتين ويااما اروح سجن ابو غريب (وهنا بس تنسونى خالص هههه) وابقوا اشربوا سفن اب يالذيذ يارايق وادعولى واترحموا عليا هههههه
وابقوا افتكروا انه انا اللى كنت عاوزة اعدل المادتين دول وتقولوا عليا شهيده الدستور وابقى اشهر من( جميله بوحريد الجزائريه )شخصيا
والسلام ختام

the dream has be soon

2010-12-05T16:49:00.002+02:00

iam too busy

ماأكونه هو ماأراه

2010-11-22T22:34:00.002+02:00

ماأكونه هو ماأراه....مقوله أحببتها فقمت بكتابتها بجوار صندوق الدنيا بتاعى( الا وهو البريد الالكترونى)
(مااكونه هو ماأراه)ماهذه الفلسفه الغير مفهومه ؟؟!!!كان هذا هو سؤال صديقتى الانترنتيه ونحن جالسين على أرض الياهو نتسامر فى حالنا وحال بلادنا اللى مش عاجب حد ولا حتى عاجب الاخ أوباما والحاشيه المتحده ,المهم ,قلت لصديقتى كيف !!انها مفهومه وواضحه زى عين الشمس فما أكونه هو ماأراه وبدات فى شرح هذه الفلسفه الغير مفهومه كما تدعى صديقتى وقلت لها (يعنى مثلا تكونى انسانه ناجحه لما ترى النجاح امام عينيكى دائما,وتكونى انسانه صادقه لما تشوفى كل شىء حواليكى صادق)والعكس بالعكس يعنى هتشوفى كل شىء جميل لما تكونى جميله وهتشوفى حياتك كلها نجاح لما تكونى ناجحه فعلا ,فكل الطرق تصل الى نفسك انتى وذاتك ماذا تريدين ان ترى حتى تكونى
لكن سؤال صديقتى جعلنى أفكر اكثر فى هذه المقوله هل حقا مااكونه هو ماأراه أم مايراه القدر والنصيب أم ما يراه الناس أم ما تراه الدنيا ؟؟؟؟؟؟؟؟؟؟فمثلا فى قضيه الاحلام جميعنا بالطبع يحلم بان يكون ويكون ويكون, لكن التساؤل هنا هل فعلا ماأصبحناا فيه هو بفعل رؤيتنا ام بفعل القدر ,فرؤيتنا لانفسنا قد تكون واضحه الى حد بعيد ومن ثم نحاول ان نكون ,لكن رؤيه القدر لنا تكاد تكون مختلفه ومن ثم لا نستطيع ان نكون كما نتمنى ان نكون ولكن نكون كما يريد القدر ان نكون .كذلك هو حالنا مع البشر والبيئه المحيطه بينا فجميعنا يتمنى ان يكون انسان معين او مختلف فى الطباع او الاسلوب او الاخلاق ولكن للاسف ليس بمقدورنا ان نكون كما نتمنى ان نكون ولكن نكون كما يحبه البشر ان نكون (هذه يااصدقائى هيا التأثر بالبيئه المحيطه التى نندمج فيها لدرجه اننا قد ننسى ماذا كنا نتمنى ان نكون)
هل حقا بامكاننا ان نحقق كل مانراه صالحا لنا أم تنطبق مقوله ليس كل مايتمناه المرء يدركه فأى المقولتين أدق وأصدق ؟؟؟!!
فكثيرا منا رأى ان يكون وزيرا او رئيسا لبلده او طبيبا فالجميع يرى انه اصلح شخص لهذا المنصب الذى يتمناه لكن من منا رأى أن يكون وزيرا وأصبح كذلك بالفعل ؟ومن منا رأى ان يكون رئيسا لبلده وأصبح كذلك بالفعل(هههههههههههه اهو هنا بالذات يستحيل نكون كما نرى فى ظل البنتجان والمهلبيه بتوعنا قصدى فى الانتخابات والبرلمان بتاعنا)
مااريد ان اصل له ان ليس بالشرط ان مااكونه هو مااراه ولكن قد يكون مايراه القدر ولست أنا

طبعا محدش فاهم حاجه لان انا شخصيا مش فاهمه هو فى ايه ؟؟؟يلا احنا داخلين ع انتخابات والواحد دماغه ضربت من كتر المرشحين (هههههه بلد ملهاش ظابط )

القلب يعشق كل جميل

2010-11-15T00:33:00.000+02:00

مكه وفيها جبال النور طلة على البيت المعمور
دخلنا باب السلام غمر قلوبنا السلام بعفو رب غفور

فوقنا حمام الحما عدد نجوم السما
طاير علينا يطوف الوف تتابع الوف
طاير يهني ضيوف بالعفو والمرحمه
واللي نظم سيره واحد ما فيش غيره
دعاني لبيته لحد باب بيته واما تجلى لي بالدمع ناجيته

جينا على روضه هلا من الجنة
فيها الاحبه تنول كل اللي تتمنى
فيها طرب وسرور وفيها نور على نور
وكاس محبه يدور واللي شرب غنى
وملائكة الرحمان كانت لنا ندمان
بالصفح والغفران جاية تبشرنا
يا ريت حبايبنا ينولوا ما نلنا
يا رب توعدهم يا رب و اقبلنا
دعاني لبيته لحد باب بيته واما تجلى لي بالدمع ناجيته

كل سنه وانتم مضحين
ومن اللحمه مقلبظين
وبالعيد فرحانيين
قولوا آميييييييييين
كل سنه وانتم طيبيين جميعااا وعيد مبارك عليكم وعلينا

عليك اللعنه أيها الحشيش

2010-11-05T02:23:00.000+02:00

*الحشيش المدعم*
يمكن كتير سمعنا عن رغيف العيش المدعم اللى بيبقى كله مسامير ورمل ده ههههه وسمعنا عن الكتب المدعمه وسمعنا عن الشاى والسكر والزيت المدعمين وسمعنااااا كتييييير عن تدعيم امريكا لمصر (خيبتنا القويه ) لكن اكيد جديد اننا نسمع عن الحشيش المدعم (دى فكرتى الجديده) طبعا اكيد سمعتم عن أزمه الحشيش وانه بقى غالى ومعدش موجود تخيلوا حتى الحشيش غلى ههههههه حاجه تجيب الصداع,المهم بقى انا فكرت وقلت المفروض الحكومه تدعم الحشيش وتبيعه مع الشاى والسكر ويبقى متوافر للجميع .وبعدين الامهات فى البيوت تعمل اييييييه؟؟؟؟زى الشطار كده يدعموا الاكل اللى بيعملوه بالحشيش يعنى مثلا لما تيجى تطبخ فراخ تحط مع البهارات شويه حشيش هههههه.
طبعا كلكم بتقولوا دلوقتى ايه البنت اللى دماغها ضاربه دى ,استنونى بس هكمل كلامى هتلاقوا ان ده عين العقل هههه
تخيلوا معايا بقى دلوقتى الفيلم التسجيلى ده :الشعب دلوقتى كله بقى بياكل حشيش مش بيشربه هههه والناس كلها دماغها بقت فى السحاب تعاالوا بقى نتخيل الحياه فى الشارع المصرى وبين ابناء الشعب
مش عارفه بصراحه ابدأ من أصغر حد فى البلد دى ولا أكبر حد فيها ,خلونا نبدأ بالكبير بتاعنا (يطول عمره يزهزه عصره وينصره على من يعاديه هاى هى ) طبعا زى ماانتوا شايفين احنا داخلين ع انتخابات وايام بلاك ,شوفوا معايا صورة للشعب مع موسيقى تصويريه يعيش الملك يعيش يا يعيش يا (ده بعد الحشيش اللى هياكلوه هههههه )وهنشوف الملك بتاعنا قصدى الريس بتاعنا صاحب اهم واكبر الانجازات هو من اهم وافضل الرؤوساء اللى تولوا العرش ,هنشوف معاه الحياه بلون تانى والحياه بقى لونها بمبى ,هنشوف تزوير الانتخابات ده اكسير الحكومه ,وهنشوف الفقر والبطاله هو ده المطلوب تنفيذه من قبل الدوله ,وهنشوف الغلاء هو ده المطلوب لاقدام الشعب على التهييس وايضا الانتحار, وهنشوف الحوادث انها تخفيف العبء عن الدوله, وهنشوف الطرق المؤرفه كاننا بنلعب بلاى ستيشن,وهنشوف الزباله فى الطرق هى ده وجهة وديكور البلد ,وهنشوف الحزب الوطنى هو منقذنا الوحيد من الهلاك ,وهنشوف احمد بيه عز هو رمز الرجل الاعتصامى والمحب لوطنه المحب جدا,وهنشوف الفساد هو احلى شاى بالياسمين ممكن تشربه فى مصر,وهنشوف المشاغبات والضرب فى المدارس هو ده التعليم الحكومى المظبوط وسلام كبير لوزير .....لا وايه هيبقى النشيد الوطنى تخيلوا !!!! (وشربت حجرين على الشيشه على الشيشه )هو ده اللى هيبقى لايق على التعليم بتاعنا هههه,وهنشوف العشوائيات مثال للحريه والكل مباح يافنان,وهنشوف مصر هى اغنى بلد فى العالم ,وهنشوف شوارع مصر فااااااااااااااااضيه وكأنها من 50 سنه فاتوا ,من الاخر هنشوف الحياه بشكل تاااااانى خاااااالص ههه
وجايز جدا لما يتشرب نشوف ابوتريكه بيلعب فى الزمالك هههههه ولا المنتخب بتاعنا اخد كاس العالم(ههههه لا تعليق)
فى نهاية الحوار الطويل العريض ده عاوزة اقولكم انه زمان من كام سنه فاتوا مكنش فيه حد بيجرؤ يقول لفظ الحشيش ده كانت عيبه وفضيحه لو حد قال حاجه زى كده ,شوفوا كام سنه عدت وبقت سيرة الحشيش كاننا بنتكلم عن الشيكولاته بالظبط ,لاء والطريف فى الموضوع ان قرات من كام يوم ان تجار الحشيش فى اسكندريه غيروا المهنه وبقوا بيتاجروا فى الحبوب لانها بتحقق مكاسب اكتر ,شفتوا الخيبه وصلت لفين,
المهم اللى عاوزة اوصله ان الحياه مش هتبقى حلوة ولا حاجه بالعكس انا شايفه ان اى حد بيقبل على المخدرات اياماكان متمثل فى ايه فهو يرغب ان يكون بلا عقل كالحيوان تماما
وان شرب الحشيش او غيره مش هو اللى هيحل المشاكل على أد مايكون هروب من واقع مرير لا يتغير طعمه ولا لونه الا اذا تغيرت أعيينا لننظر لها بنظرة نعم للتغيير ولا للصمت
انا خلاص خلصت كلامى ودمتم مهيسيين هههه

اسأل روحك...اسأل قلبك

2010-10-29T14:08:00.002+02:00

اسأل روحك

إسأل روحك .. إسأل قلبك .. قبل ما تسأل إيه غيّرني
أنا غيّرني عذابي في حبك .. بعد ما كان أملي مصبّرني
غدرك بيّ .. أثّر فيّ .. و اتغيّرت شوية شوية
اتغيّرت و مش بإيدية
و بديت أطوي حنيني إليك .. و أكره ضعفي و صبري عليك
و اخترت ابعد .. و عرفت أعند
حتى الهجر قدرت عليه .. شو ف القسوة بتعمل إيه

كنت زمان بلاقيك بحناني .. بحر محبة و بر أمان
كنت باحس ان انت زماني .. يومي و بكرة و بعده كمان
كنت باشوفك بعيون حبي .. و انت بعيد أو و انت بقربي
أقرب من بسمتي لشفايفي .. أقرب من إحساسي لقلبي
بعد الود اللي راعيته لك .. بعد الحب اللي وهبته لك
بعد العمر اللي انا عشته لك .. فيه إيه تاني أقدمه لك؟

أنا مانسيتش الحب و عهده .. و لا أيامه ولا لياليه
أما ان كان ع الحب لوحده .. من غير هجرك أهلا بيه
أنا حيّرني هواك .. و أنا علشان انساك
بابعد عن كل مكان .. رحته و لو مرة معاك
و اهرب من أقرب ناس يعرفوا قصتي وياك
و باغيّر أي كلام بيجيب سيرة لذكراك
وصلتني للحال ده بإيدك .. بعد ما كانت روحي ف إيدك
سِبتك و مفيش حد في عمري .. يشغل عنك قلبي و فكري
سِبتك من غير حتى ما أفكّر .. حأقدر أسيبك أو مش حأقدر

إسأل روحك .. إسأل قلبك .. قبل ده كله اتغيروا ليه
أنا غيرني عذابي ف حبك .. لكن انت غيّرك إيه؟
هو حناني عليك قسّاك حتى عليّ؟
ولا رضايَ كمان خلاك تلعب بيّ؟
ولا تسامح روحي معاك غرّك بيّ؟
أنا يا حبيبي صحيح باتسامح .. إلا ف عزة نفسي و حبي
و اما يفيض بي ما باعرف أصالح .. و أعرف آجي كتير على قلبي

غدرك بيّ .. أثّر فيّ
و اتغيّرت شوية شوية .. اتغيّرت و مش بإيدية
و بديت أطوي حنيني إليك .. و أكره ضعفي و صبري عليك
و اخترت أبعد و عرفت أعند .. حتى الهجر قدرت عليه
و انت يا عيني .. لو في مكاني يا عيني
كنت حتعمل غير كده إيه؟
إسأل روحك

كلمات شاعرنا العظيم أحمد رامى
غناء كوكب الشرق

لا تعليق......

2010-10-18T01:32:00.001+02:00

مساء الخير عليكم.....
كان صعب مكتبش عن اللى حصل النهارده كل اللى فات كوووم والنهارده كوم تانى خالص ولو حطينا الاكوام على بعضها هيطلع كلام كبير ....
اولا- حدث النهارده الا وهو ماتش الاهلى والترجى والنتيجه المأساويه اللى حصلت ولو ان انا شايفه انه خير عظيم لان لو كانوا كسبوا كانوا هيجيوا متقطعين ,عاده التونسه والجزائريين ولا هيشتروها ,وكون ان الحكم طلع بيشرب شاى بالياسمين من بتاع مرجان احمد مرجان فهنا اقدر اقول .....لا تعليق
ثانيا-كون انهم يقيلوا ابراهيم عيسى ويمنعوا برنامجه علشان مش بيقول حاجه خالص غير صباح الحقيق يامصر .....فلا تعليق
ثالثا-كون ان وزير الخارجيه عالى المقام يرفع قضيه على حمدى قنديل بتهمة السب والقذف ....فلا تعليق
رابعا-كون ان جيهان السادات ترفع قضيه ع محمد حسنين هيكل تتهمه بانه قال ان السادات قتل عبدالناصر.....فلا تعليق
خامسا-كون ان ظباط الشرطه بتوعنا الموقريين ثوصل بيهم الجرأه انهم يضربوا بنات جامعة الازهر ويشتموهم ......فلا تعليق
ساديسا-كون ان الطماطم بقت تقريبا ب 9 جنيه !!!فلا تعليق الا انه كل شىء بيغلى غير البنى ءادم وخطوط الموبايل
سابعا-كون ان مفيش مكان فى البرطمان بتاعنا ,قصدى البرلمان ,بسبب زياده عدد النساء....فلا تعليق
ثامنا- كون ان حسن شحاته مختارش شيكا فى المنتخب هنا بس اقدر اعلق واقول يستاهل اننا خسرنا والله انا كنت حاسه ان حسن شحاته راح النيجر من غير لاعيبه متفهموش هما كانوا بيلفوا حوالين بعض ف الملعب وتقريبا نسيوا انهم بيلعبوا كورة وقالوا نمشيها استغمايه ههه
كفايه كده احسن مصر كمان كلمتين من دول هتموت ف ايدينا وهيبقى شكلها زى البرجر من غير كاتشب هههههه
انا بجد كان وحشنى الكتابه جدا واقلت اكتب حاجه لايت كده ع مانستعيد الذاكره ونشيل من عليها شويه الغبار دول....حلوة حته الغبار دى هههههههه

جدد حلمك

2010-08-01T15:26:00.003+03:00

مسااااء الخيراااات على عيون المشاهدين .....ازي الصحه وازي الحال طبعا مبسوطين وعال العال .....ده انتوا قاعدين فى ام الدنيا مش فى الدنيا بس هههههههههه

المهم عاوزة اقولكم على حدث عظيم ولا احداث سبتمبر ...أقول مقولشى انا خايف اقول.....المهم بجد بيقولوا خير اللهم اجعله خير كده ان صحيت فجأه لقتنى اخدت الماجستير متسألوش ازاى علشان أنا اخدته فى الوقت الضايع وفى ظروف غامضه ههههههههه المهم انه اتاخد وخلاص.....طبعا السؤال اللى بيطرح نفسه انا هعمل ايه بالماجستير هو فعلا سؤال ملح بكمون ههههه انا بفكر اروح اشتغل بيه ممرضه اهو حتى هنداوى الجروح اللى عملتها الدنيا فى الناس هههه ظريفه انا صح؟؟؟؟؟؟
المهم انا بقولكم على الخبر المفجع ده علشان نتكلم فى قضية الاحلام حتى الاحلام عملنا منها قضيه .يمكن كلنا اكيد بنحلم احلام جميله وورديه وطلعتنا معاها للسما والنجوم والفضاء الخارجى ,وطبعا الحمد لله مفيش ولا حلم اتحقق ونزلنا على جدور رقابتنا بس متقلقوش لسه متكسرناش هههههههه لسه فينا نفس والله,لكن لما مش بنحقق اى حاجه من اللى كنا بنتمناه لازم هيدخلنا اليأس ده طبيعى يعنى والا هنكون ناس معندهاش دم ههههههه لكن المفروض منطولش فى حاله اليأس ونقف تانى على رجلينا ونجدد احلامنا ,اولا لاننا مش هنكسب حاجه لما نفضل محبطين بل بالعكس هنخسر كل حاجه ده غير ان ربنا اكيد اختار الافضل لينا بس لازم نسعى فى الطريق الصح بس مش الطريق الصح بتاع معز مسعود ده طريق تانى موازى ليه ههههه.اكتشفت مؤخرا او يمكن انا عارفه ده لكن كنت محتاجه احسه اكتر ,هو ان الدنيا بجد اتفه بكتييييييييييييييييير من اللى احنا عاملينوا فى نفسنا ده ومش مستاهله كل البروباجندا دى, المهم انك تفهمها صح علشان تعيشها صح ويكون طبعا بما يرضى الله.
فى النهايه واللى عاوزة اوصله انه اكيد مش كل اللى بنتمناه بيكون هو الخير لينا بالعكس ممكن يكون اسوء حاجه فى الدنيا وممكن اللى بنكرهه يكون احب مالينا "وعسى ان تكرهوا شيئا ويجعل الله فيه خيرا كثيرا"
وزى مابيقولوا حب ماتعمل حتى تعمل ماتحب ......ده اذا كنا بنعمل اصلا ههههههههه بلا خيبه
المهم انك تقدر تحقق ذاتك فى المكان اللى ربنا اختاره ليك واكيد هنقدر!!!!! المهم اننا منفضلش نبكى على الاطلال كتير لان اللى راح عمره مابيرجع تانى يبقى الصح اننا ننظر نظرة" رضا وأمل "وكل عيلتهم ههه للمستقبل

انا شخصيا يمكن لسه محستش ان حققت حاجه بالرغم ان المفروض اى حد ياخد الماجستير يبقى حقق شىء مهم فى حياته بس اصل انا طماعه شويه امتلك نفس طواقه ,لسه الطريق طوووووووووويل على ماابدا احس ان عملت حاجه بس طبعا الحمد لله على كده انا بصراحه مكنتش عامله حسابى ان هنجح وكلام من ده هههههههههه والله انا لما نتيجة التحريرى ظهرت جالى اكتئاب احلى حاجه كل ماانجح يجيلى اكتئاب شفته هبل اكتر من كده, اصل بصراحه مكنتش مرتبه لموضوع النجاح ده مش بقولكم الواحد اخده فى الوقت الضايع فعلا نحمد الله على كل حال,على فكره والله كنا ناويين نعمل وليمه وزغاريط وجو نجاح وكده بس للاسف لما يشأ الله ذلك وبردوا نحمد الله
ده احنا والله غرقانين فى نعم ربنا علينا بس اللى يحمد ربه بقى
المهم انا خلاص خلصت الحواديت بتاعتى أهم حاجه متنسوش تجددوا احلامكم وعلى راى اللى بيقول لو بطلنا نحلم نموت وانا شايفه اننا لو بطلنا نحلم هنام نوم عميق, اصل انا بحس ان الاحلام اللى بنشوفها واحنا نايمين دى بضيع الوقت وبتاخد من الوقت المخصص للنوم ههههههههه معلش ياجماعه دماغى فرقعت خلالالالالالالاص

رساله اليكى ياحبيبة قلوبنا
الله يرحمك ياأسماء بجد كان نفسى تكونى موجوده معانا بجد مفتقدينك انا عارفه انك كنتى هتبقى مبسوطه اوى بنجاحى علشان انتى دايما كنتى بتشجعينى وحابه اللى انا بعمله ان شاء الله نتقابل فى الجنه ياعروس الجنه
اللهم اجعلها من اهل الجنه ياااااارب

انا لله وانا إليه راجعون

2010-07-20T13:33:00.002+03:00

لله يرحمك ياأسماء
اللهم اغفر لها وارحمها واجعلها من أهل الجنه وأعذها من عذاب النار
اللهم اجعل قبرها روضه من رياض الجنه
اللهم يمن كتابها ويسر حسابها
اللهم أبدلها دارا خيرا من دارها واهلا خيرا من أهلها وزوجا خيرا من زوجها

أسألكم الدعاء لها عن ظهر الغيب

وجاءت الطامة الكبرى...

2010-06-14T00:05:00.002+03:00

ورجعنالكم بعد الفاااااصل الطوووووويل ونقوووول ألووووو من تانى .عاملين ايه فى ظل الأحداث الرائعه اللى بنمر بيها دى طبعا كلكم تمام وزى الفل مفيش مشاكل عندنا خالص هههه
المهم انه حصل شويه حاجات مش هقول ترفع الضغط لان الضغط جه خلاص وطبعا مينفعش الضغط يعلى من غير السكر ده تبقى حتى عيبه فى حق السكر هههه ومينفعش نقول القولون لانه خلاص جالنا من الاعلانات اللى فرقعت دماغنا اكتر ماهى مفرقعه والله هو الواحد يروح يموت احسن اهو حتى يوفر الامراض دى ههههه
نبدأ الأول بالأخبار الخفيفه وده كان يعاصر أول ماده فى الامتحانات كانت ماده عجيبه زى دكتورها, وهو نكسة الزمالك مع الأهلى ههههه ونقول مين اللى هياكل الكيكه شيكا ولا تريكه اهو تريكه أكلها كلها لوحده وطبعا الزمالك مخلصهاش الموضوع ده فضلت تدعى على الاهلى انه يزور بعد اكل الكيكه فخسر كاس مصر وأخده حرس الحدود وطبعا نحن معشر الزمالك شامتتنا كانت بالأكوام فى الاهلويه يلا احسن يستاهلوا هههههههه

ننزل بقى على تانى ماده وكانت معاصره لانتخابات مصطبة الشورى قصدى مجلس الشورى اصل بصراحه انا بنسى ان احنا عندنا مصطبطين يوووووه قصدى مجلسين هتودونا ورا القمر ههههه, كنا راحين فى امانة الله الامتحان وقال ايه هنمتحن ماده اسمها( اقتصاديات الاصلاح المؤسسى فى مصر)انتوا واخدين بالكم من الاسم ماعلينا المهم مكنش فيه مواصلات خالص بسبب الانتخابات قلنا فرجت من عندك يارب ومش هنروح الامتحان بس للاسف روحنا بردوا ههههه, انا بس نفسى حد يقولى هو مجلس الشورى اللى مش بيشوروا حد خالص بيعمل اييييييييييييييييه؟؟؟؟؟؟؟؟ لاء وايه تقريبا كل اللى فازوا كانوا من الحزب اللى اسمه ايه ده وطنى ولا قومى ماعلينا من الاسم ,هنقول ايه غير ربنا يتولانا برحمته.

نيجى بقى على الحدث الأهم واللى قامت الدنيا عليه بس قعدت تانى متقلقوش هههههه وهو سفينة المعتقلين قصدى سفينة الحريه طب بالله عليكم ده اسم, يعنى مكنوش عارفين انهم هيعتقلوا كانوا غيروا اسمها, قال حريه قال, سلام كبير والله لfreedom, المهم اللى ينرفز واللى يضحك فى نفس ذات الوقت هو لما بيحصل حاجه من دى تلاقى الدنيا ايييه بقت ناااااار و فى ثانيه بتطفى معرفش المطافى سريعه ليه هنا هههه, وتركيا قالت احنا بنفكر فى هجوم على اسرائيل والدول العربيه ياعينى زعلانه ونفسويتها تعبت من اللى حصل, لاء والانكت بسأل ياجماعه امال مصر فين كده محدش سامع ليها صوت قالولى ازاااااااى مصر فتحت المعبر يارجاله هههههه انا بس كنت عاوزة أنبهم لما يجوا يقفلوا المعبر ياخدوا بالهم احسن يقفلوه على صوباعهم ههههههه, على الله كان يتقفل على ايديهم كلها ونخلص بقى.احلى حاجه ان دلوقتى معدوش بيتكلموا على السفينه ولا كأن فيه حاجه حصلت من الأساس طب طالما كده ليه الشبورة اللى غاويين يعملوها كل مره دى ماانتوا لو كنتوا ناويين تضربوا اسرائيل كنتوا ضربتوها من زمان مش هتفضلوا تتكلموا كتير .حال العرب بقى بيفكرنى بالظبط بالصرصور اللى مقلوب على ضهره ههههههه والله بيصعب عليا العرب محتاجه حد يجى يعدلها سلوكها العوج ده وهتبقى كويسه .نروح فاصل الاول قبل مالضغط يعلى عندكم
**
*
*

عدناااااااا أخدت فاصل ظريف, الكهربه فصلت فيه بس انا طلعت أذكى منها وكنت سيفت اللى كتبته ههههه أصل الواحد شرب كتير من مقالب الكهربه دى .نرجع لأحداث النهايه ....

أخر حدث واللى جنن كل أهل اسكندريه هو قتل خالد سعيد اللى قتله المخبرين ,ويقال من البعض انه أخد جرعة مخدرات جاله اختناق ومات ,هما كانوا ناقص يقولوا انه كان بياكل بسكويت جاله تسمم هههههه
يعنى شفت الهبل وصل لفين يعنى بالمنطق والعقل لما المخبر يجى يقبض على واحد هيستناه ياخد شمة المخدرات بتاعته ويموت على إثرها هههههه,أصلهم فى برنامج شبابيك كانوا بيعلقوا على اننا لازم نتأكد من أى خبر قبل مانذيعه
وانا معاهم فى ده, بس يمكن فى حالة خالد دى محدش فكر يتاكد هل هى دى صورته فعلا بعد مامات ولالاء, لان للاسف احنا بقينا واخدين على كده من الداخليه ,وبكده بنكون بنعيد كلاكيت تانى مره فيلم( هى فوضى) ونرجع ونقول اللى ملوش خير فى حاتم ملوش خير فى مصر ههههه. فعلا الفيلم ده صور لنا اللى بيحصل بالظبط فى أقسام الشرطه وعندنا بدل ماالداخليه هيا اللى بتحافظ على الأمن بقت هيا سبب الذعر والاضطراب .يلا عليهم من الله مايستحقون
اللى عاوزة اوصله انه بجد لو التحقيقات اظهرت ان سبب وفاته هو ضرب المخبرين وبالصورة اللى ءادميه دى يبقى لازم تقال وزارة الداخليه ,لالالالا المفروض الحكومه كلها تقال وده يكون أبسط شىء ممكن يتعمل
لاء وأحلى حاجه كان عندى ماده اسمها( الحمايه الدستوريه لمبدا الكرامه الانسانيه) اللى غالبا الدبلومه كلها هتشيلها ههههههه يعنى بالله عليكم مطلوب مننا نكتب فى الكرامه الانسانيه واحنا حتى منعرفش ريحتها طب ده معقول

وأخييييييرا بجد بجد الحال وصل لمداه والناس هتنفجر خلاص من اللى جواها وياسلام لما تشوفوا برنامج واحد من الناس والله بنتعقد حقيقى مش متخيلين ان لسه فيه كده وان لسه فيه ناس مش لاقيه لا تاكل ولا تشرب يعنى الموت اهون بكتير " يااااااااااااريت ترحمى بقى ولالالالادك يامصر "ياللى يقال عليكى ام الدنيا بس مع المصريين محصلتيش مرات أبوهم

ونقووول ألووو لأول اتصاااااااال ..........

آآه من الأيام آه

2010-04-27T23:28:00.003+02:00

أحلى حاجه فى الدنيا لما تلاقى الأمان اللى كنت طول عمرك بتبحث عنه.....

وأصعب حاجه فى الدنيا لما يتوه منك تانى فى زحمتها..........

**إعتذار خفيف
بعتذر ليكم ياجماعه هبعد شويتين صغننين عن التدوين لظروف قهريه وعصبيه وزفتيه هههههه
أسألكم الدعاء لى عن ظهر الغيب

مبرووك عليكم التعادل

2010-04-19T04:25:00.000+02:00

مساء الخير على جمهورى العزيز إيه اخباركم فى الجو الحر ده ؟شكلنا كده مش هنكمل بقية الصيف فى الجو ده هههه
المهم المفروض ان كنت أعمل البوست ده من يومين بس الظروف مسمحتش وكان هيحصلى حاجه لو متكلمتش عن الحدث والجميل فى نفس ذات الوقت ههههههه
الموضوع ومافيه ان ماتش الزمالك والأهلى كان راااااائع أول مره فى حياتى أحس انهم بيلعبوا كورة مش بلي ههههههه عارفين انتوا البلي ولا متعرفهوش, ماعلينا,
طبعا نبارك للاهلى على التعادل اللى وصلوا ليه فى الوقت الاضافى يلا حظهم كده هههههه بس الغريب ان حسام حسن والفريق كله كان زعلان ليه مش عارفه بالرغم انهم بجد لعبوا كويس جدااااااا اما مسأله المكسب والخساره فده كله بأمر الله المهم فى النهايه كان فيه كورة حلو وجمهور أحلى واستاد أحلى وأحلى ههههههه
بس ده لا يمنع بردوا ان الاهلاويه هيفضلوا بالنسبه للزملكاويه من الاعداء ههههههه لاء بهزر طبعا فى الاخر الكل مصرى وابن مصرى وعماااااار يامصر بولادك

بعد المقدمه العريضه دى ندخل فى موضوعنا ولا أقولكم نروح فاااااااصل ونرجعلكم........
***

*****
******
بعدالفاصل الرخم ده واللى ملوش اى لازمه اصلا بس حركات بقى انتوا عارفين وجو تلفزيون مصرى ههههههه عارفين انتوا الاعلان بتاع (كده كده شيبسيكوا مطرقع.....كده كده قرمشته تسمع )هههههه انا بموت فى الاعلان اللى بتبقى فكرته مجنونه وروشه كده
خلونا فى موضوعنا وسيبكم من الاعلانات اللى هتجبلنا وجع فى اسنانا ده .اللى لاحظته الفتره اللى فاتت ان الكل كان بيعلق على الاعلام ويقال ان الاعلام اللى بقى بيمشينا دلوقتى الاعلام الكوروى (خالد الغندور ,ومصطفى عبده, وطاهر ابوزيد ,وابراهيم حجازى) وإن الكل بقى بيعلق كتير على تعلق الشعب بالماتشات والكورة وكل ماحد يجى يتكلم يقولك ماهو لو فيه ماتش هنروحه جرى يعنى من الاخر الكل بقى بيعلق تقصيرنا فى كل نواحى الحياه بحبنا للكورة والماتشات معرفش ليه؟
يمكن لان الناس بقت بتزودها شويه !!!! عموما أياماكان السبب فأنا شايفه ان الماتشات ماهى الا متنفس للناس عن الكبت والضغط اللى جواهم لانه الساعه ونص بتوع الماتش تلاقى الواحد مركز جدا جدا فى الماتش فبجد أنا بحس ان الساعه ونص دول بيخرجوا الشخص من عباءة الهموم والضغوط وياسلام بقى لما فريقه اللى بيحبه زى الزمالك كده مثلا يكسب الماتش تلاقيه بعد الماتش منشرح الصدر ومبسوط ومزاجه بقى فى السحاب هههههه ويمكن فيه ناس تقولك ايه الهيافه اللى الشعب بقى فيها دى وانه يفرح اوى لما فريقه يكسب ويقولك يعنى احنا هناخد ايه لما يكسبو؟؟؟احنا بكل بساطه مش هناخد حاجه خالص بس الفكره فى لما بشوف ماتش ما بخرج كل الطاقه اللى جوايا فى التشجيع والتصفيق والصويت بردوا مفيش مانع ههههه وخصوصا لو كان زى ماتش الزمالك والاهلى كان حته ماتش هههههه انا شخصيا كان عندى طاقه رهيبه وخرجتها كلها فى الماتش حسيت كأنى زى حسين ياسر المحمدى وتعبت من كتر اللعب ههههههه ,فيه ناس بردوا ممكن يقولوا ماانتوا تطلعوا الطاقه دى فى حاجه مفيده؟طبعا كلامهم صح بس إيه المشكله انه يكون فيه ساعه بروح فيها عن نفسى طالما لا تغضب الله
عموما من الكلام الكبير اللى انا قلته ده ههههههه وأقاويل بعض الناس عن الماتشات معرفش هما مين الناس دول أصلا هههههه بس هما أكيد ناس يعنى
أنا شايفه طالما أى شىء فى الدنيا بيتعمل بحدود ومفيش فيه أى غلط أو عيب أو حاجه تغضب ربنا فميش مانع أبدا نحبها ونستناها مش فاهمه والله ليه الكل بقى بيعترض جدا على الماتشات برغم حب الناس ليها يعنى حتى المتنفس الوحيد ليهم مستخسرينه فى الشعب ماتسيبوا الشعب ينبسط ياجماعه ده ياما شال هموم !!!!!

كلمه أخيره مبروك للأهلى على التعادل اللى جه فى أخر لحظه مكتوبالكم هههههههه انتوا عارفين لو كان بس لسه فيه كمان دقيقتين كنت اتقطعتم بس يلا علشان محدش يشيل من حد هنرضى بالتعادل المره دى هههههه وطبعا تحيااااااااااااتى لكل الزملكاويه فيما فيهم طبعا نونو وبيدو حبايبى طبعا هتسالوا مين نونو وبيدو دول بس أنا مش هقولكم هههههههه غلاسه وخلاص
وأخر كلامى سلالالالام وأشوفكم على خير فى قضايا الشعب!!!!!!

شقع بقع....ياديل الفار

2010-04-07T01:56:00.003+02:00

شقع بقع

أنا الأديب و لا تعرفنيش

تقرألي لكن ما تشوفنيش

كلامي لا هو مادهون ورنيش

و لا المعاني عليها غبار

شقع بقع يا ديل الفار

***

يا شعب مصر يا خم النوم

ما تفوق بقى و تشوف لك يوم

الثورة قامت في الخرطوم

و انت اللي نايم بالمندار

شقع بقع يا ديل الفار

***

يا شعب ثور داهية تسمك

و شيل أصول أسباب همك

عصابه

بتمص في دمك

و الاسم قال ضباط احرار

شقع بقع يا ديل الفار

***

أخدوا اليهود غزة و سينا

و بكرة يبقوا هنا وسطينا

و الراديوهات بتغدينا

خطب و نتعشى اشعار

شقع بقع يا ديل الفار

***

الشيخ امام قال كلمة حق

و الست سومة قالت لأ

و أبو النجوم على ودنة اندق

في المعتقل و الدنيا نهار

شقع بقع يا ديل الفار
**أحمد فؤاد نجم **

المواطنون..وحرب الزباله

2010-03-31T23:17:00.006+02:00

سلام الله عليكم جميعا أجيال الغد المشرق حلوة المشرق دى ولو إن البشاير مش بتقول ان فيه إشراق خالص بس أهو كلالالام هههههههه المهم أنا كنت عاوزة أتكلم فى موضوع هام للغايه طبعا كلكم هتقولولى ماتتكلمى حد ماسكك,لا حد ولا سبت ماسكنى أولا الموضوع ملوش أى علاقه بالصورة اللى فوق بس أنا حطتها حلاوة روح ههههههه
ندخل بقى فى الموضوع ألا وهو حرب الزباله ,فعلا والله هى مش بقت حرب ده بقت خيبه بعيد عنكم ,وبما أن أنا من أنصار المحافظه على البيئه كما يقال عنى فحبيت أناقشكم فى الموضوع ده وأحكيلكم عن بعض المواقف اللى حصلت.
كنا مره وإحنا خارجين من المحاضره فشوفت طالبة ماجستير محترمه واللى أدها اتجوز وخلف ومات ههههه المهم إنها رمت ورقه على الأرض اللى غاظنى مش إنها رمتها على الأرض بس ,الأكتر من كده رمتها فين؟؟؟ قدام مكتب العميد أنظف مكان فى الكليه على الإطلاق طب ليه يابنتى تعملى كده كان نفسى أمسكها أرميها من الدور التانى مش الورقه لاء البنت حقيقى تصرف يدعو إلى الإشمئزاز ,أنا عارفه ان ده للأسف بقى العادى بتاعنا وإن معندناش ثقافة النظافه والمحافظه على البيئه وكمان مفيش عندنا حاجه اسمها نرمى الورقه فى الباسكت لاء ازاى ده تبقى عيبه فى حقنا لازم نرميها جمب الباسكت ونتسائل ليه ياجماعه تم صناعة الباسكت هههههه ده ديكور بس ,الحكومه حطتها ديكور فى الشارع.
لاء الأغرب من كده تلاقى الكل بيشتكى من القمامه ووجودها بشكل مستفز فى الشارع طب بالله عليكم ايه المطلوب من الحكومه تنزل تجمع الزباله من البيوت ولا ايه بالظبط المطلوب ,والغريب كمان إنك شويه فى شويه تلاقى الناس اتعودت على منظر الزباله جمب البيت لدرجة إنها لو مش موجوده تحس بحاجه غريبه ههههههه تقول هو ياترى الشارع ناقصه ايه؟دلوقتى بقت الزباله بتكمل الرونق الجمالى للشارع .
ومن ده كتير ,فى إحدى زياراتى لقاهرة المعز حلوة أحدى زيارتى دى ده على أساس ان من السياح اللى بينزلوا يقضوا week endفى القاهره هههههه المهم خلونا فى موضوعنا وبطلوا بقى التعليقات الرخمه دى ,المهم أنا كنت دخلت شارع غلط وهى منطقه معروفه بس مش هقول على اسمها أحسن يقولوا إن بطلع عليهم سمعه .والله العظيم الشارع لا يمكن أن يتصور من أكوام الزباله اللى فيه لدرجه أن حسيت أنها شويه شويه وهطول العمارات هههههه والغريب بجد ان فيه ناس عايشه فى الأماكن دى والبلكونات بتطل على المناظر دى والله أنا شكيت ان فيه بنى ءآدمين ساكنين فى المنطقه دى, حاجه لا تصدق ,يعنى حتى الزباله بقت قضيه ولازم تتناقش المهم إن أحنا اللى عملناها بتصرفاتنا الغلط كل اللى بياكل حاجه لازم ولابد يرميها فى الشارع حتى اللى راكبين عربيات تقريبا والله أعلم هما عاملين الشبابيك فى العربيات مش للتهويه( حاشا وكلا البطه) هما عاملينها علشان نرمى منها الورق والزباله .
احنا كده قلنا اللى علينا وهى إن الشعب فعلا لا يعرف ثقافة المحافظه على البيئه نيجى بقى على دور الحكومه أولا فيه نقص شديد جدا فى صناديق الزباله يعنى فى المنصورة فى أحسن مكان فيها وأكثرها نظافة وهو قدام فندق رامادا للأسف مفيش فيها باسكت خالص الغريب إن المنطقه دى دايما نضيفه!!!!! .حاجه تانيه وهى أعتقد إننا عندنا وزارة تدعى وزارة البيئه بتعمل ايييييييييه بقى؟ ؟؟؟؟الله أعلم ,يعنى هو الوزير ولا الوزيره المسئوله عن البيئه هيحصل إيه لما تنزل كل يوم محافظه تشوف الأخبار فيها؟ ده هما 30 محافظه غلابه يعنى شهر وتخلصهم لف وأهو حتى المحافظات تتنضف على حسهم ماانتوا عارفين مفيش حاجه بتنضف الإ إذا نورنا مسئول !!!!!!!! والله لو الوزير خايف على البدله من البهدله بقوله والله مش هتتبهدل مستعدين نشترى بدله تانيه بس انزلوا شوفوا المحافظات عامله إزاااااى!!!!
كمان فيه حاجه عندنا بردوا بيقولوا إسمها المجالس الشعبيه المحليه والله نفسى حد يقولى هيا بتعمل إيييييه المجالس دى؟؟؟؟؟؟؟؟أعتقد والله أعلم إن المجالس المحليه دى هى اللى بتلون البيض فى شم النسيم ههههههههه
يعنى لو كل مسئول فى المجلس اللى ملوش لازمه ده قام واهتم بتنضيف الشوارع هيتعب !!!!آآآآآآه فعلا هيتعب وممكن يجيله حساسيه فى الجيوب الأنفيه من التراب .
آخر موقف حصل معايا وأنا بردوا فى قاهرة المعز كان معانا ورق شيبسى وحاجات من دى عاوزة أرميها وأنا عندى حساسيه لو رميت حاجه على الأرض للأسف طبعا, فالمهم ندور على باسكت علشان نرميها أبدا لا ممكن نلاقى وكأن تم تصدير كل الباسكتات اللى فى البلد المهم بنسأل العامل اللى كان بيقطع التذاكر لو عنده باسكت نرمى الورقه تخيلوا عمل اييييييه؟؟؟بكل بساطه أخد مننا الورق وبردوا بكل بساطه راح رماه من الشباك من الجهة التانيه ههههههه ,هل تتخيلوا بالتصرف ده إن مصر لسه فيها امل وإننا ممكن نحافظ عليها
أنا خلاص خلصت كلامى بس نفسى بجد نغير فينا العاده السيئه دى ونبطل نرمى ورق فى الشارع يمكن يجى اليوم ومصر تنضف
وأخيرا إكتشفت شىء مهم جدا فى مصر أن فيه 3 حاجات مهمين جدا جدا وبردوا ملهمش أى لازمه خااااالص ياترى هما ايييييييه؟؟؟؟؟ اللى يحل الفزورة دى ليه عندى عزومه بيتزا ههههههه وشيكولاتيه علشان يحلى هههه
وأخيرا يقول (الرسول صلى الله عليه وسلم)(إن الله طيب يحب الطيب نظيف يحب النظافة)

وبمناسبه شم النسيم وشم أى حاجه تانيه أسيبكم مع الصورة اللى جايه وأحب أقولكم إن الفرق بين الصورة اللى فوق والصورة دى هو سور بيفصل بين المكانين الأول فى الجامعه والتانيه بره الجامعة مباشره جمب صور الجامعه وإليكم الصورة

إليكى ياأمى

2010-03-18T00:26:00.004+02:00

ألقيت بين يديك السيف والقلم

أرجو رضاكى الذى أعلوا به القمم

أنتى الهنا والمنى...

أنتى الدنا وأانا ...على ثراك وليد قد نمى وسمى
أماااه هذا اللحن يسحرنى.... ويلهب الشوق بى والحزن والندما
أمااه هذا الجرس يأسرنى.... ويسكب العطر فى جنبياو السلاما

أماه انتى حديث الروح ان هدئا
أو أرسلت دمعه
أو رتلت نغما
فإن جفوتك فيما فات من عمرى....فالدمع من ندمى رغم الثباتهما
فلتغفر الذنب لى ياأمى...واحتسبى وحاكمينى وكونى الخصما والحكما

اسأل روحك

2010-02-19T15:47:00.001+02:00

أراك عصي الدمع شيمتك الصبر

أما للهوى نهي عليك ولا أمر

نعم أنا مشتاق وعندي لوعة

ولكن مثلي لا يذاع له سر

بيت العز نور يادكتووور

2010-02-19T15:47:00.000+02:00

حمد الله على السلامه ياابو اجمل ابتسامه

مبروووك يادكتورة

2010-02-19T15:31:00.000+02:00

عذرى اليكم فما ضاعت مودتكم وماارتضينا بغير الشوق عنوانا يامن نقشت على قلبى معزتكم وكنتم فى قرار العين سكانا سالت ربى لكم حفظا وغفرانا وأن يجمعنا تحت ظل العرش اخوانا
أحبك فى الله

نعيب فى زماننا.....والعيب فينا

2010-02-07T01:46:00.004+02:00

أصعب حاجه على الإنسان أنه يفاجأ وبدون أى مقدمات بتغير الصفات الجميله فيه للأسوء

والأصعب انه لما يحاول يرجع زى ماكان مش عارف يرجع

والأصعب من ده كله أنه مش عارف ايه سبب التغيير ده ,وكل مايحاول أنه يعرف السبب يكتئب اكتر ويكره الحياه أكتر وأكتر

ياترى العيب فى مين؟؟؟؟؟

ليه لما العيون مكنتش بتشوف غير النور والأمل فجأه مش بتشوف غير الظلام واليأس
ليه لما القلوب مكنتش بتشيل غير كل الخير فجأه بدأ يتخللها .........
ليه بعد ماكان كل همه هو رضا ربه بقى كل همه ياترى الدنيا هتدينى ايه؟ وهتاخد منى ايه؟
أخيرا ....ليه الأيام بتغير القلوب والنفوس

طبعا محدش فاهم حاجه ومن هنا أقدر أقولكم أبشر ياتيمور بقينا على أعتاب باب الجنان ( وهو المطلوب إثباته)

تنبيه هااااام هذا الكلام من وحى المؤلف وأى تشابه بينه وبين شخصيات عامه المؤلف غير مسئول هههههههه

بقايا.....بقايا

2010-01-14T01:31:00.001+02:00

لماذا أراك على كل شيء بقايا.. بقايا؟

إذا جاءني الليل ألقاك طيفا..

وينساب عطرك بين الحنايا؟

لماذا أراك على كل وجه

فأجري إليك.. وتأبى خطايا؟

وكم كنت أهرب كي لا أراك

فألقاك نبضا سرى في دمايا

فكيف النجوم هوت في التراب

وكيف العبير غدا.. كالشظايا؟

عيونك كانت لعمري صلاة..

فكيف الصلاة غدت.. كالخطايا..

* * *

لماذا أراك وملء عيوني

دموع الوداع؟

لماذا أراك وقد صرت شيئا

بعيدا.. بعيدا..

توارى.. وضاع؟

تطوفين في العمر مثل الشعاع

أحسك نبضا

وألقاك دفئا

وأشعر بعدك.. أني الضياع

* * *

إذا ما بكيت أراك ابتسامه

وإن ضاق دربي أراك السلامة

وإن لاح في الأفق ليل طويل

تضيء عيونك.. خلف الغمامة

* * *

لماذا أراك على كل شيء

كأنك في الأرض كل البشر

كأنك درب بغير انتهاء

وأني خلقت لهذا السفر..

إذا كنت أهرب منك.. إليك

فقولي بربك.. أين المفر؟!

فاروق جويده

الزمن الطيب جاااى يامنصوور....

2010-01-10T14:15:00.001+02:00

أسعد الله أوقاتكم مشاهدى برنامجى اللى محدش لسه سمع عنه ههههه سمسمه والحياه
طبعا بعد الغياب الطويل شويتين فيه أحداث كتير حصلت الفتره اللى فاتت وحمدت ربنا ان كنت قافله المدونه علشان متكلمش عن اى حاجه حصلت لان لو كنت اتكلمت اكيد كنت هخبط فى الحلل والواحد مش ناقص ههههه
خلونا فى موضوعنا بقى أكيد أغلبنا سمع أو قرأ ان القضاء الادارى بمجلس الدوله أيد قرار( وزير التعليم العالى) و(رئيس جامعة عين شمس) بمنع المنتقبات من الدخول فى الامتحان بالنقاب وعلى الصعيد الأخر ألغت القرار اللى كان بردوا صادر من( رئيس جامعة عين شمس) بدخول المنتقبات المدينه الجامعيه و
قالت المحكمة: «إن المحكمة الإدارية العليا أكدت فى أحكامها أن ارتداء النقاب يدخل ضمن الحرية الشخصية للفرد إذا لم يخل أو يتجاوز حدود النظام العام والقواعد المنصوص عليها دستوراً وقانوناً»
وحطوا مليون خط تحت( الحريه الشخصيه )دى.المهم انتوا عارفين ان الموضوع بدأ أساسا من أول ماشيخ الازهر قام بزياره لاحد المعاهد وطلب من احدى الطالبات خلع النقاب طالما كل اللى موجودين نساء وتوالت الاحداث الى ان وصلنا الى قرار المحكمه
واكيد البعض منكم شاف حلقة وائل الابراشى لما استضاف 2 منتقبات دكاتره فى كليه زراعه جامعة عين شمس ومعاهم صحفيه غريبه كده وكانت عجيبه ف كلامها لدرجه ان كان نفسى اروح اخنقها ,وائل الابرشى كان بيقولها انتى متضررة ف ايه ان هى لابسه نقاب ردت عليه وبتقوله هى كده جارت على حقى لان من حقى ان اشوفها واعرفها انا مش فاهمه والله تعرفها بتاع ايه المهم ان كان فيه محامى معاهم قالها لو عاوزة تشوفيها ممكن بس فى غرفه خاصه لانها هى بتحتجب بالنقاب عن الرجال فقط ودى حريه شخصيه ,ورجعت تانى تقولهم طب الطلاب بيفهموا منكم ازاى وبتتواصلوا معاهم ازاى هما ردوا عليها وقالولها بالعكس فيه تواصل كبير جدا بينا وبين الطلاب بتوعنا,طب بالله عليكم انا عاوزة افهم انا لما يكون الدكتوره بتاعتى او المدرسه بتشرحلى انا هعمل ايييييييييه بوشها او بملامحها بالعكس انا شايفه ان التواصل بيكون بالعيون والمنتفيبه غالبا بتكون عيونها ظاهره .يعنى المنتقبه دلوقتى تروح تولع فى نفسها علشان الدوله ترتاح ولا ايه المطلوب؟؟؟؟
انا بجد هفرقع يعنى الطالبه المنتقبه تعمل ايه دلوقتى وهى صادر ضدها قرار بعدم دخول الامتحان بالنقاب هل تتخلى عن مبداها وتشيله علشان تدخل الامتحان ولا تفضل متمسكه بفكرها ومبادئها ومتدخلش الامتحان وتقعد فى بيتهم وتقول يعنى هعمل ايه بالتعليم والشهاده ,انتوا ايه رايكم المنتقبات هيعملوا ايييييه؟؟؟؟؟
انا طرحتلكم الموضوع....... نروح فاااااااصل ونرجعلكم........شفت انتوا الاعلان بتاع شيكولاته جالكسى انا حاسه انهم بيجيبوا الاعلان ده علشان يعذبونى ههههه
منظر الشيكولاته بيبقى يجنن .....

اقولكم بقى رأيى اولا انا هبعد عن المسائل الدينيه لانه الى الان محدش عارف ان كان هو فضل او فرض وده انا قراته ,علماء كتير قالوا فضل والبعض قال فرض وفيه علماء قالوا كلام غريب وعجيب ومن بعض كلامهم احدى الدكاتره الافاضل فى كليه الدراسات الاسلاميه قالت:انه الاصل فى الشريعه ان تغطى المراه المسلمه العاقله البالغه جسدها عدا الوجه والكفين ولان الدين الاسلامى صالح لكل زمان ومكان فمن حق ولى الامر ان يقيد المباح اذا ترتب عليه ضرر امنى يهدد استقرار المجتمع وهذا لايعد مخالفه امر قطعى ومفروض.المهم اللى فهمته من كلامها ان النقاب فضل وان رئيس الدوله ممكن يمنعه طالما بيهدد امن المجتمع.المهم خلونا نخرج من المساله الدينيه وندخل بقى فى تخصصنا (القانون) شوفوا مواد الدستور بتقول ايه:

المادة (2) الإسلام دين الدولة، واللغة العربية لغتها الرسمية، ومبادئ الشريعة الإسلامية المصدر الرئيسى للتشريع.

المادة (46) تكفل الدولة حرية العقيدة وحرية ممارسة الشعائر الدينية
واخدين بالكم طبعا ان الشريعه الاسلاميه المصدر الرئيسى للتشريع (فينك يامشرع تشوف الماده 2 من الدستور يمكن مش بتاخد بالك وانت بتسن القوانين بتاعتنا)
لاء وكمان الدوله بتكفل حرية العقيده ....انهى عقيده بالله عليكم هما سابونا حتى نتمسك بفكر واحد ولا عقيده ولا العقيده عندهم هى الديانه فقط

المادة (41) الحرية الشخصية حق طبيعي وهى مصونة لا تمس.......
ياجماعه دستورنا بيقول الحريه الشخصيه حق طبيعى يعنى متأصله متأصله (فيه ايه بعد كده علشان يقولوا اخلعوا النقاب)

المادة (57) كل اعتداء على الحرية الشخصية أو حرمة الحياة الخاصة للمواطنين وغيرها من الحقوق والحريات العامة التي يكفلها الدستور والقانون جريمة لا تسقط الدعوى الجنائية ولا المدنية الناشئة عنها بالتقادم، وتكفل الدولة تعويضاً عادلاً لمن وقع عليه الاعتداء

انتوا شايفين اللى انا شايفاه الدستور بيقول كل اعتداء على الحريه الشخصيه جريمه لاتسقط الدعوى الناشئه عنها بالتقادم .....يافرحتى بدستورنا امال ايه اللى هما بيعملوا ده ولما يفرضوا ع المنتقبات انهم يخلعوه ده ان شاء الله بيلعبوا استغمايه ههههههه
المشكله بجد مش انهم يشيلوا النقاب اولا لاء المشكله انهم بيجبرونا اننا نتنازل عن مبادئنا وافكارنا الخاصه احنا خلالالالالاص بقينا فى زمن البطاااااااطس وياسلام لو عليها كاتشب ومايونيز ههههههه ده تبقى زى الفل
بجد احنا فى بلد الماسك على مبدائه كالماسك على قطعه من الجمر
عموما انا شايفه طالما هما مصممين اوى ان النقاب يتمنع خلاص اوك مفيش مشكله بس قبل مايطبقوا الموضوع ده ياريت بقى يجبروا الجميع انهم يتحجبوا ويلبسوا لبس محتشم مش الشريعه بتقول كده وياريت يمنعوا البنات اللى بتنسى تلبس هدومها وهما خارجين من دخول الجامعه ماهو المساواه فى الظلم عدل
وياريت كمان يروحوا يولعوا فى شارع الهرم الملىء بالنوادى الليليه ولا على الاقل ميخلوش الرقص الشرقى ليه ترخيص هو كمان, ده الراقصات عندنا كانوا بيطالبوا يكون ليهم نقابه لسه مستنين ايه تااااااااانى طبعا حقهم مش بشر بردوا ياولاد هههههههه مش بقولكم بقينا فى زمن البطاطس
وياريت كمان يروحوا اسكندريه ولا شرم ويولعوا فى محلات الخمره والويسكى اللى بقت بتتشرب زى البيبسى بالظبط
لو الدوله عملت كده ساعتها المنتقبات هيخلعوا النقاب بتاعهم
بس كان عندى استفسار طب نفرض مثلا الرجل مصمم ان زوجته تلبس النقاب وبيغير عليها جدا من اى حد ساعتها هيعمل ايييييه؟
زوجته تقوله ياراجل خلاص النقاب بقى ممنوع بقى عيب يقولها وانا مليش دعوه ياتلبسيه ياتروحى عند باباكى هههههههه وساعتها هتبقى( الخيبه منها بكره بقرشين )ههههههه

انا بجد مش عارفه المنتقبات هيعملوا ايييه؟ لجأوا للقضاء وطلع القضاء ضدهم لسه فاضل ايه يعملوه؟
الله يرحمه عمى جاب الله لما قال فى مسلسل سوق العصر الزمن الطيب جاى يامنصور ,مات عمى جاب الله ومقلش لينا الزمن الطيب هيجى امتى؟ بس تقريبا ياعمى جاب الله الزمن الطيب راح وحلف 3 ايمانات ماهو راجع......وده مش تشاؤم لكن كل الحقائق والدلائل بتثبت اننا خلالالالالاص بقينا فى زمن البطاطس والكوسه وكل الخضروات ههههه

وع فكره مش عاوزاكم تقلقوا خالص من الموضوع ده احنا دلوقتى بنعمل زى ماالدستور بيقول:
المادة (47) حرية الرأي مكفولة، ولكل إنسان التعبير عن رأيه ونشره بالقول أو الكتابة أو التصوير أو غير ذلك من وسائل التعبير في حدود القانون، والنقد الذاتي والنقد البناء ضمان لسلامة البناء الوطني.

يعنى محدش له عندنا حاجه حريه الرأى مكفوله يامدونين العرب.......واكيد النقد بتاعنا بناء درجه اولى هههههههههه
نسيت اقولكم حاجه تانيه علشان يبقى قولنا اللى لينا واللى علينا ......بعض المنتقبات فعلا أساءوا للنقاب جدا ,بس مش معنى ان بعض المسلمين وحشين يبقى الاسلام وحش وبالتالى مش معنى ان بعض المنتقبات اساءوا للنقاب يبقى النقاب وحش, وكمان يتمنع..... لالالالالا كده كتييييير
المشكله كمان لو تشوفوا الاعلان بيصورلنا الشيوخ ازاى واد ايه تفكيرهم متطرف وغير مواكب للعصر يخليك تخاف تتعامل معاهم بالرغم ان فعلا كتير منهم على قدر من الاحترام وبيحاولوا يطبقوا الشريعه على قدر المستطاع,لكن ارجع واقول بعضهم بسبب تصرفاتهم اللى ملهاش علاقه بالاسلام اصلا هما السبب فى الناس خافوا منهم ونظروا ليهم نظرة استهجان .....
كفايه كده عليكم فى الجو البرد الحار ده ........واسيبكم بقى تقولوا رايكم عن الموضوع ده وغالبا وانتوا بتتصلوا الحكومه هتقطع سلك التليفون ههههههه فممكن تبعتوا على ايميل البرنامج بس الحقوا قبل مالقناه بتاعتنا تتشمع بالشمع الاخضر ههههههههه

ورجعنالكم بعد الفااااااصل

2010-01-04T02:45:00.001+02:00

سلام الله عليكم جميعا
ياااااااااه الفاصل كان طويييييل وباااااايخ اوى حقيقى التدوين وحشنى جداااااا وبجد افتقده وافتقدت كل المدونات الجميله اللى كانت دايما منورانى
كل سنه والجميع بخير ويارب يارب تكون سنه سعيده على الجميع ونقدر نحقق أى حاجه من أحلامنا
ومازلنا على أمل ان ممكن حاجه تتغير سواء فينا أو فى الدوله المهم يبقى فيه تغيير
ان شاء الله هزور كل المدونات لانها كلها وحشتنى ووحشنى موضوعاتكم وان شاء الله نرجع تانى ندون هو احنا ورانا ايه غير التدوين اما نشوف اخرتها معاه هههههه
كل سنه وانتوا طيبين

يارب

2009-11-01T19:11:00.002+02:00

ربنا ظلمنا انفسنا وان لم تغفر لنا وترحمنا لنكونن من الخاسرين

ابكى

2009-10-23T17:00:00.004+02:00

سلام الله عليكم جميعا ياقوم
عاملين ايه فى ظل انفلونزا الخنازير وانفلونزا الطيور وانفلونزا الجواز وكل الانفلونزات اللى فى الدنيا هههه حاسه ان جالى برد من كتر الكلام ع الانفلونزا وعارفه كل اللى هيدخل مش هيبطل يعطس وهتجيب انفلونزا للمدونه وهنعوز المصل وشغلانه ههههه عافانا الله واياكم من البلاء اللى بقينا فيه
المهم حلقة النهارده اجتماعيه شويتين هسيبكم الاول مع التقرير الجاى ده وهو كلمات اغنيه لمنير عارفه انكم هتستغربوا وهتقولوا اغنيه ايه دى اللى هنعملها بوست اسيبكم الاول مع التقرير ونرجعلكم تانى

ابكــــــــــــــى**

ابكـــى لو فى عينى دمـــوع
و اضحكـــى لما اكـــون فرحـــان
احضنينى لو الغرام ممنوع
حسى بيا وبعنيا كونى شوق وحنان
محتجلك تبقى جانبى
تبقى قلبى
تبقى عمرى
تبقى روح الروح
انا عايزك تبقى ليا
تبقى فيا
اوعى ثانية من حياتنا تروح
تبقى صوتى لما اغنى
تبقى عينى لما اشوف
تبقى احساس الامان الى عمرة ما يبقى خوف
***********

ورجعنالكم بعد الفاصل بس ايه رايكم الاول فى الكلمات اكيد جميله طبعا مش انا اللى حطاها ههههه
الاغنيه دى خلتنى افكر فى موضوع مهم جدا ويمكن منى الشاذلى اتكلمت عليه من فتره وهو العنوسه
قبل مانتطرق للموضوع هقولكم تعليقى على الاغنيه كلماتها ان واحد بيقول لحبيته اللى المفروض زوجته مش حاجه تانيه علشان محدش يقول ان احنا بندعو الى الارتباط اللى مش بشكل رسمى لالالا بعيدين كل البعد
المهم هو بيقولها انه محتاج الامان وانها تبكى لما يكون هو اللى محتاج يبكى والعكس فى الفرح يعنى من الاخر تحس بيه وبكيانه / ماهو طبيعى اى زوجه بتحس بزوجها من غير مايتكلم وبتكون اشد الناس حزنا على حاله لو هو مش مبسوط نيجى بقى على الصعيد الاخر وهى الزوجه الطرف التانى هى اللى بتكون محتاجه زوجها فى اوقات كتير وبتكون محتاجه للامان اكتر منه بكتير وللاسف الشديد اغلبهم ولا فى دماغهم الموضوع اصلا ومحدش يقولى انتى متحامله عليهم انا والله مش متحامله خالص بالعكس انا كنت دايما شايفه ان الزواج كفكره شىء جميل ورمانسى وربنا شرعه لازدياد الحب وتكوين اسر سليمه ولارتقاء المجتمع وحاجات كده كتير وكنت شايفاها علاقه فيها حب ووئام وئام ده ابن عمى ههههه المهم وفيه تفاهم وحاجات حلوه كتير لكن للاسف الصورة اللى فى خيالى بدات تهتز وده نظرا للمشاكل الكتيره جدا اللى سمعت عنها مؤخرا والله العظيم صدمه بمعنى الكلمه سمعت روايات ههههه واحده اتجوزت اسبوع وسابت بيتها علشان ابو الزوج وامه مش مريحين وواحد اتجوز شهر واتخنق من زوجته فطلقها ده غير نسب الطلاق اللى معدش ليها عدد
مشفتوش طبعا خيبه اكبر من كده ههههه والله ماعارفه هى الناس اتجننت ولا ايه المهم ان اغلب الزوجات اللى بسمع كلامهم يقولولى اصله قدر ونصيب /لا اله الاالله/ هو انا قلت حاجه اوك طبعا قدر ونصيب لكن عقولنا بتروح فين لما نيجى نختار بصراحه انا شايفه انه بيكون سوء اختيار وانها قدمت تنازلات كتير بترجع تندم عليها ف الاخر
نرجع بقى لموضوعنا وهو العنوسه كانوا فى البرنامج بيقولوا انه اكتر سبب بيؤدى للعنوسه هى الاسباب الاقتصاديه وع فكره العنوسه شامله الطرفين الرجل والنساء
بقولكم ايه ماتيجى نروح فاصل الاول احسن زهقت

***

رجعنا بعد الفاصل وخصوصا الفاصل بتاع دريم لاند متعة الحياه هههههه اعلان فعلا يرفع الضغط والله الناس دى هتموتنا قريب هههه
نرجع لموضوعنا انا شايفه ان من اهم اسباب العنوسه هى شخصيه كل من الطرفين يعنى مثلا لما واحده زيى كده تسمع المشاكل الكتيرة بين لازواج طبيعى جدا هتتعقد ناس تانيه مرت بقصص حب عبيطه كده ملهاش اى لازمه برده يرفعوا راية العصيان ع الزواج ومن ده كتير وزى ماتقولوا قولوا فاعتقد ان الحل الوحيد ليها ان الشعب كله يروح لطبيب نفسى هههههههه واهو نعمل للاطباء النفسيين اى شغل احسن بحسهم غلابه ومش شغالين واهو بكده ممكن نقضى ع البطاله هههه
انا خلاص خلصت الحلقه وعاوزة اسمع منكم حلول للموضوع ده
وتقولولى انتوا مع ولا ضد ان الشعب يتعالج نفسيا

لالا للتطبيع.....وان كنت ناسى افكرك

2009-10-04T13:39:00.002+02:00

اسعد الله صباحكم جمهور قناة السويس ههه
النهارده ياجماعه موضوع الحلقه بجد استفزنى جدا جدا اكيد طبعا كلكم سمعتوا عن سياسه التطبيع بين مصر واسرائيل اللى عاوزين يطبقوها واكيد بعضكم شاف حلقة منى الشاذلى وهى بتناقش الموضوع ده اللى انا فهمته ان مصر عاوزة توسع علاقاتها باسرائيل ويبقى فيه تبادل ثقافات يعنى مثلا قناه اسرائليه تستضبف عندها شخصيه مصريه واحنا مثلا نستضيف شخصيه صهيونيه علشان نتبادل الثقافات ياجماعه هههههه
بالله عليكم شفتوا الخيبه وصلت بينا لفين مغلطش حمدى قنديل لما قال هى مبقتش امة محمد هى اصبحت امة مهند وده نظرا للمسلسلات التركيه الهابطه من وجهة نظرى واللى بتصطنع الرومانسيه والحمد لله هو ده اللى فالحين فيه فى تبادل الثقافات
انا عاوزة حد بس يقولى بالله عليكم لما مثلا قناة زى قناة الجزيرة لما تحب تستضيف شخصيه زى نتنياهو او اى شخصيه صهيونيه بالله عليكم احنا نقعد نسمعه ازاى بجد انا مش فاهمه لما يجيبولى شخصيات لسه بس من كام شهر قتلت الالاف والالاف من اخوانا الفلسطنين انا اقعد اسمعه ازاااااااااااااى ونقول احنا بنتبادل ثقافات
عاوزة افهم ثقافات ايه اللى هنتبادلها مع اسرائيل ثقافة القتل/ثقافة الدمار/ثقافة الطغيان/ثقافة الظلم والعنف/ثقافة الغصب ونهب اراضى مش بتاعتى/ثقافة محاربة الله ورسوله
اى ثقافه عاوزينا نتبادلها مع اسرائيل يعنى هى الدنيا ضاقت بينا ومش لاقيين غير اسرائيل
الغريب انهم معتقدين ان اسرائيل ترغب فى السلام واحنا ياعينى المسلمين يمتازوا بالارهاب ومعاداة السلام تخيلوا انتوا بقى
كان فيه برنامج حلو جدا للدكتور محمد فتحى متخصص فى التنميه البشريه كان فى اخر البرنامج بيقول حاجه عن القدس ومقولات على لسان بعض اليهود وقال ان فيه كاتب يهودى قال فى احد كتبه ان اسرائيل لا تعرف السلام
شوفوا وماظلمناهم هما اللى بيقولوا على انفسهم وصدق فعلا هى بلد لا تعرف السلام وده لسبب بسيط جدا لانهم كفار يعنى انتوا عاوزين تفهمونى ا ابو جهل وابو لهب والشله دى كانت عاوزة سلام جاوبوا انتوا
انا شايفه انهم بجد زودوها مع اسرائيل ويوم عن التانى بيعترفوا بيها كدوله فعلا وياخوفى احسن نصحى فى يوم الصبح نلاقى الاسرائلين مشرفين عندنا ودى هتبقى اخرة تصرفاتنا
لا والاغرب ان بعض الضيوف فى برنامج منى الشاذلى كانوا مع التطبيع وبشده عجبنى اوى محمد صبحى لما بيقول لمنى الشاذلى انتى بتسالى كل اللى بيتصل انت ليه ضد التطبيع طب ماتسالى ضيوفك انتوا ليه مع التطبيع ممكن يكونوا شايفين الصهاينه بشكل تانى
وعجبتنى كلمه برده من احد المتصلين بتقول قس درجة ايمانك بدرجة حبك للارض المقدسه وبصراحه واضح ان مصر بتعز الاراضى المقدسه جدا
ولسه احنا ياما هنشوف ايام مايعلم بيها الا ربنا
اللهم ارنا الحق حقا وارزقنا اتباعا وارنا الباطل باطلا وارزقنا اجتنابا
انا خلصت الحلقه بس قبل ماامشى اتمنى كلنا نقف مع انفسنا ونشوف قدر حبنا للقدس فى قلوبنا وياترى ليها نصيب من دعائنا ولالاء

وقال ربكم ادعونى استجب لكم

2009-08-28T15:19:00.002+02:00

اللهم اهدِنا فيمَن هديت .. وعافنا فيمن عافيت .. وتولنا فيمن توليت .. وبارك لنا فيما أعطيت .. وقِنا شر ما قضيت .. انك تقضي ولا يقضى عليك.. اٍنه لا يذل مَن واليت .. ولا يعزُ من عاديت .. تباركت ربنا وتعاليت .. لك الحمد على ما قضيت .. ولك الشكر على ما أعطيت .. نستغفرك اللهم من جميع الذنوب والخطايا ونتوب اٍليك.

اللهم أقسم لنا من خشيتك ما تحول به بيننا وبين معصيتك .. ومن طاعتك ما تبلّغنا به جنتَك .. ومن اليقين ما تُهون به علينا مصائبَ الدنيا .. ومتعنا اللهم باسماعِنا وأبصارِنا وقواتنا ما أبقيتنا .. واجعلهُ الوارثَ منا .. واجعل ثأرنا على من ظلمنا.. وانصُرنا على من عادانا .. ولا تجعل مصيبتَنا في ديننا .. ولا تجعل الدنيا أكبرَ همِنا .. ولا مبلغَ علمِنا .. ولا اٍلى النار مصيرنا .. واجعل الجنة هي دارنا .. ولا تُسلط علينا بذنوبنا من لايخافك فينا ولا يرحمنا.

اللهم أصلح لنا ديننا الذي هو عصمةُ أمرِنا .. وأصلح لنا دنيانا التي فيها معاشُنا .. وأصلح لنا آخرتنا التي اٍليها معادنا .. واجعل الحياة زيادةً لنا في كل خير .. واجعل الموتَ راحةً لنا من كلِ شر.

اللهم انا نسألك فعلَ الخيرات .. وتركَ المنكرات .. وحبَ المساكين.. وأن تغفر لنا وترحمنا وتتوب علينا .. واٍذا أردت بقومٍ فتنةً فتوَفنا غير مفتونين .. ونسألك حبَك.. وحبَ مَن يُحبك.. وحب عملٍ يقربنا اٍلى حبك .. يا رب العالمين.

اللهم اغفر لجميع موتى المسلمين .. الذين شهدوا لك بالوحدانية ..ولنبيك بالرسالة .. وماتوا على ذلك .. اللهم اغفر لهُم وارحمهُم وعافهم وأعفو عنهم .. واكرِم نزلَهم .. ووسِع مدخلهم .. واغسلهم بالماء والثلج والبرَد.. ونقهم كما ينقى الثوب الأبيض من الدنس وارحمنا اللهم برحمتك اذا صرنا الى ما صاروا اٍليه .. تحت الجنادل والتراب وحدنا.

اللهم اغفر لنا .. وارحمنا .. وأعتق رقابنا من النار .

اللهم تقبل منا اٍنك أنت السميع العليم .. وتُب علينا اٍنك أنت التواب الرحيم .
وصلي اللهم على سيدنا محمد وعلى آله وصحبه وسلم

اللهم أحسِن عاقبتنا في الأمور كلها .. وأجرِنا من خِزي الدنيا وعذاب الآخرة .. اللهم اٍن
نسألك اٍيمانا كاملاً .. ويقينا صادقا .. وقلبًا خاشعًا ..ولسانًا ذاكرًا ..وتوبة نصوحة .. وتوبة
قبل الموت .. وراحة عند الموت .. والعفو عند الحساب .. ونسألك الجنةَ ونعيمَها .. ونعوذ
بك من النار .. يارب العالمين.

اللهم اٍنا نسألك موجباتِ رحمتك .. وعزائمَ مغفرتك .. والغنيمةَ من كل بر .. والسلامة من كل
اٍثم .. والفوزَ بالجنة.. والنجاة من النار .. يا ذا الجلال والاكرام.

اللهم اغفر لنا ذنوبنا .. ووسع لنا خُلُقنا .. وطيّب لنا كسبنا .. وقنعنا بما رزقتنا .. ولا تذهِب
قلوبنا اٍلى شيء ٍ صرفتَه عنا.

اللهُم اٍنا نعوذ بك أن نَضِل أو نضَل .. أو نَزِل أو نُزَل .. أو نَجهل أو يُجهَل علينا .. أو
نظلِم أو نظلم .

اللهُم اٍنا نسألك عيشةً نقيةً .. وميتةً سويةً .. ومرَداً غير مخزٍ ولا فاضِح.

اللهم رضِنا بما قضيت لنا .. وعافنا فيما أبقيت .. حتى لا نُحِب تعجيلَ ما أخّرت .. ولا تأخير
ما عجّلت.

اللهُم اٍنا نعوذ ُ بك من زوال نعمتِك .. وتحوّل عافيتك .. وفَجأةِ نِقمتك .. وجميعِ سَخطك.

اللهم اٍنا نعوذ ُ بك من يومِ السوء .. ومن ليلةِ السوء .. ومن ساعةِ السوء .. ومن صاحبِ
السوء .. ومن جار السوء في دار المقامة.

اللهم اٍنا عبيدُك .. بنوعبيدك ..بنو اٍمائك .. نواصِينا بيدك .. ماضٍ فينا حُكمك .. عدلٌ
فينا قضاؤك .. نسألك بكلِ اسم هو لك .. سمّيتَ به نفسَك .. أو أنزلتهُ في كتابك .. أو
علّمته أحداً من خلقك .. أو استأثرت به في علم الغيبِ عندك .. أن تجعل القرآن ربيعَ
قلوبنا .. ونورَ صدورنا ..وجَلاء حُزننا .. وذهاب همِنا وغمِنا .

وصلى الله على سيدنا محمد وعلى آله وصحبه وسلم.

اللهم ما أصبح أو أمسى بنا من نعمة أو بأحد من خلقك فمنك وحدك ..لا شريك لك فلك الحمد .. ولك الشكر.

اللهم أعنا على ذكرك وشكرك وحسن عبادتك .

اللهم اجعلنا هادين مهتدين ..غير ضالين ولا مُضلين سلما لأوليائك .. وعدوا لأعدائك نحب بحبك مَن أحبك ونعادي بعداوتك من خالفك.

اللهم اعطنا اٍيمانا ويقينا ليس بعده كفر .. ورحمة ننال بها شرف كرامتك في الدنيا والآخرة.

اللهم اٍنا نسألك الفوز في العطاء والقضاء ، ونزل الشهداء وعيش السُعداء والنصر على الأعداء.

اللهم ذا الحبل الشديد .. والأمر الرشيد .. نسألك الأمنيوم الوعيد .. والجنة يوم الخلود مع المقرّبين الشهود الركّع السجود .. الموفين بالعهود .. اٍنك رحيمٌ ودود وأنت تفعل ما تريد.

اللهم اٍنا نسألك من خير ما سألك منه محمد - صلى الله عليه وسلم - ونعوذ بك من شر ما استعاذ منه نبيك محمد - صلى الله عليه وسلم - وأنت المستعان وعليك البلاغ ولا حول ولا قوة اٍلا بالله.

اللهم انا نسألك من الخير كله عاجله وآجله .. ما علِمنا منه وما لم نعلم .. ونعوذ بك من الشر كله عاجله وآجله ماعلمنا منه وما لم نعلم .. ونسألك الجنة .. وما يقرب اٍليها من قولٍ وعملٍ ونعوذ بك من النار .. وما يقرب اٍليها من قولٍ وعمل.

اللهم اٍجعل في قلوبنا نورا.. وفي أبصارِنا نورا .. وفي أسماعِنا نورا .. وعن أيماننا نورا .. وعن يسارنا نورا .. وفوقنا نورا ..
ومن تحتنا نورا .. وأمامنا نورا .. وخلفنا نورا .. واجعل لنا نورا.

يا حي يا قيوم برحمتك أستغيث .. أصلح لي شأني كله ولا تكلني الى نفسي طرفة عين.

اللهم أعزّ الاسلام والمسلمين ..
اللهم أعز الاسلام والمسلمين ..
اللهم أعز الاسلام والمسلمين ..

ودمّر أعداء الدين .. واخذل مَن خذل الدين ..

اللهم فك قيد أسرانا وأسرى المسلمين ..
اللهم فك قيد أسرانا وأسرى المسلمين ..
اللهم فك قيد أسرانا وأسرى المسلمين ..

برحمتك يا أرحم الراحمين ..

وصلى الله على سيدنا محمد وعلى آله وصحبه وسلم

اللهم لك الحمد أنت قيِّومُ السموات والأرض ومن فيهِن ، ولك الحمد
لك ملكُ السموات والأرض ومن فيهن ، ولك الحمد .. أنت نورُ السموات والأرض ومن فيهن ، ولك الحمد ..

أنت الحق ، ووعدك الحق ، ولقاؤك حق ، وقولك حق ، والجنة حق، والنار حق ، والنبيون حق ، ومحمد - صلى الله عليه وسلم - حق ، والساعة حق .. اللهم لك اسلمنا .. وبك آمنا.. وعليك توكلنا.. واٍليك أنبنا .. وبك خاصمنا .. واٍليك حاكمنا .. فاغفر لنا ما قدمنا وما أخرنا ، وما أسررنا وما أعلنا .. وما أنت أعلمُ به منا أنت المقدِمُ وأنت المؤخرُ .. لا اله الا أنت سبحانك .. اٍنا كنامن الظالمين ولا حول ولا قوة الا بالله.

اللهم يا مقلّب القلوب .. ثبت قلوبَنا على دينك .

اللهم فارجَ الهَم ، كاشِف الغم ، ومجيب دعوة المضطرين ..رحمنَ الدنيا والآخرة ورحيمَهُما نسألك أن ترحمَنا .. فارحمنا برحمةٍ تغنينا بها عن رحمةِ مَن سِواك.

اللهم انا نعوذُ بك من عملٍ يُخزينا ، ونعوذُ بك من صاحبٍ يؤذينا .. ونعوذُ بك مِن أملٍ يلهينا .. ونعوذ بك من فقر يُنسينا ..ونعوذ بك من غِنى يُطغينا .

اللهم انا نسألك صحةً في اٍيمان ، واٍيمانا في حُسن خُلق ونجاحًا يتبعه فلاح ، ورحمة منك وعافية ومغفرةً منك ورضوانا .

اللهم لك الشكر على كلِ شيء ، ولك الحمدُ على كلِ حال.

اللهم لا تقتلنا بغضبك ولا تُهلكنا بعذابك وعافنا قبل ذلك .

اللهم اٍنا نسالك أن ترفع ذكرنا .. وتضع وزرنا .. وتُصلح أمورنا .. وتطهر قلوبَنا .. وتحصّن فروجنا.. وتنور قلوبنا .. وتغفر لنا ذنوبنا .. ونسألك الدرجات العُلى من الجنة .

اللهم ارحمنا بترك المعاصي أبدا ما أبقيتنا ، وارحمنا أن نتكلف ما لا يعنينا وارزقنا حُسن النظر فيما يرضيك عنا ، اللهم بديع السموات والارض ذا الجلال والاكرام والعزة التي لا تُرام أسألك ياالله يارحمن بجلالك ونور وجهك أن تلزم قلوبنا حفظ كتابك كما علمتنا ، وارزقنا تلاوته على النحو الذي يرضيك عنا ، اللهم بديع السموات والارض ذا الجلال والاكرام والعزة التي لا ترام نسألك ياالله يارحمن بجلالك ونور وجهك أن تنور بكتابك أبصارنا .. وأن تطلق به ألستنا .. وأن تفرج به عن قلوبنا .. وأن تشرح به صدورنا .. وأن تستعمل به أبداننا فانه لايعيننا على الحق غيرك ولا يؤتينا اٍياه الا أنت ... ولاحول ولا قوة الا بالله العلي العظيم .

اللهم احفظنا بالاسلام قائمين .. واحفظنا بالاسلام قاعدين .. واحفظنا بالاسلام راقدين ولا تشمِّت بنا عدوًا ولا حاسدًا.

وصلى الله على سيدنا محمد وعلى آله وصحبه وسلم .

اللهم انا نسألك من كل خير خزائنه بيدك .. ونعوذ بك من كل شر خزائنه بيدك .

اللهم انا نعوذ بك من منكرات الاخلاق والاعمال والاهواء والادواء.

اللهم انا نعوذ بك من الفسوق والشقاق والنفاق والسمعة والرياء .. ونعوذ بك من الصمم والبكم والجنون وسيء الاسقام.

اللهم مالك الملك تؤتي الملك من تشاء .. وتنزع الملك ممن تشاء .. وتعِز من تشاء وتذل من تشاء .. بيدك الخير انك على كل شيء قدير .. رحمن الدنيا والآخرة .. تعطيها من تشاء وتمنعها ممن تشاء .. ارحمنا رحمة تغنينا عن رحمة من سواك.

اللهم انا نعوذ بك من الهَم والحَزَن ونعوذ بك من العجز والكسل ... ونعوذ بك من الجبن والبخل .. ونعوذ بك من غلَبة الدَين وقهر الرجال .

اللهم رب السموات السبع وما أظلّت .. ورب الأرضين وما أقلت ورب الشياطين وما أضلت .. كُن لنا جارًا من شر خلقك أجمعين أن يُفرط علينا أحد منهم أو يطغى .. عز جارُك .. وتبارك اسمك.

اللهم أسلمنا وجوهنا اٍليك .. وفوّضنا أمورنا اٍليك والجأنا ظهورنا اليك .. رغبة ورهبة اليك لا ملجأ ولا منجى منك الا اليك .. آمنا بكتابك الذي أنزلت .. ونبيك الذي أرسلت.

اللهم أنت حسنت خَلقنا فحسن خُلقنا وحرم وجوهنا على النار .. الحمد لله الذي سوى خلقنا فعدله وكرم صورة وجوهنا فأحسنها .. وجَعَلنا من المسلمين .

اللهم اكفِنا بحلالك عن حرامك واغننا بفضلك عمن سِواك .

اللهم اغفر لموتى المسلمين وارحمهم .. وعافهم واعفُ عنهم .. وأكرِم نزلهم .. ووسّع مُدخلهم .. واغسلهم بالماء والثلج والبَرَد ونقهم من الخطايا كما نقيت الثوب الابيض من الدنَس .. وابدِلهم دارًا خيراً من دارهم .. وأزواجاً خيراً من أزواجهم .. وأدخلهم الجنة وأعذهم من عذاب القبر ومن عذاب النار.

اللهم اغفر لنا ذنوبنا كلها .. دِقها وجلّها .. وأولها وآخرها .. وعلانيتها وسرها .

اللهم ربنا لك الحمد ملء السموات و ملء الارض وملء ما بينهما .. وملء ما شئت من شيء بعده ..أهل الثناء والمجد أحق ما قال العبد .. وكلُنا لك عبد .. لامانع لما أعطيت ولا معطي لما منعت .. ولا ينفع ذا الجد منك الجد .

اللهم انا نعوذ بك من عذاب القبر.. ونعوذ بك من فتنة المسيح الدجال .. ونعوذ بك من فتنة المحيا والممات .. ونعوذ بك من المأثم والمغرم.

اللهم بعلمك الغيب وقدرتك على الخلق ..أحيينا اذا علمت الحياة خيرًا لنا .. وتوفنا اذا علمت الوفاة خيرًا لنا ..

اللهم انا نسألك خشيتك .. في الغيب والشهادة ..ونسألك كلمة الحق في الغضب والرضى ..ونسألك القصد في الفقر والغنى ..ونسألك نعيمًا لا ينفد ونسألك قرة عين لا تنقطع .. ونسألك الرضى بعد القضاء .. ونسألك برد العيش بعد الموت .. ونسألك لذة النظر الى وجهك الكريم والشوق الى لقائك .. في غير ضراء مضرة .. ولا فتنة مضلة .. اللهم زينا بزينة الايمان .. واجعلنا هداة مهتدين .

وصلى الله على سيدنا محمد وعلى آله وصحبه وسلم

اللهم آتِ أنفسنا تقواها .. وزكّها أنت خيرُ من زكّاها .. أنت وليّها ومولاه

اللهم انا نعوذ بك من علمٍ لا ينفع .. ومن قلبٍ لا يخشع .. ومن نفس لا تشبع .. ومن دعوة لا يُستجاب له

اللهم يا حي يا قيوم برحمتك نستغيث .. أنزل علينا الغيث ولا تجعلنا من الآيسين ... اللهم أغِثنا .. اللهم أغِثنا .. اللهم أغِثنا اللهم سُقيا رحمة .. لا سُقيا بلاءٍ ولا هدمٍ ولا غرق

اللهم انا نسألك الهدى والتُقى .. والعفاف والغنى
اللهم انا نسألك العفو والعافية .. في الدين والدنيا والآخرة

اللهم اغفر للمسلمين والمسلمات .. والمؤمنين والمؤمنات ...الأحياء منهم والأموات برحمتك ياأرحم الراحمين

يا حي يا قيوم لا اله الا أنت سبحانك.. اٍنّا كُنا من الظالمين
ياحي يا قيوم لا اله الا أنت سبحانك .. اٍنّا كُنا من الظالمين
ياحي يا قيوم لا اله الا أنت سبحانك .. اٍنا كنا من الظالمين

اللهم اغفر لنا خطيئاتنا وجهلنا واسرافنا في أمرنا اللهم اغفر لنا جدنا وهزلنا وخطأنا وعمدنا وكل ذلك عندنا برحمتك يا أرحم الراحمين

اللهم انا نعوذ بمعافاتك من عقوبتك ونعوذ برضاك من سخطِك ونعوذ بك منك اللهم لا نحصي ثناءً عليك - ولو حرصنا - أنت كما أثنيتَ على نفسك

اللهم اغفر لنا ذنبنا .. واخسِيء شيطاننا .. وفك رهاننا .. وثقل ميزاننا .. واجعلنا في النديّ الأعلى

اللهم انك تعلم سرنا وعلانيتنا .. فأقبل معذرتنا وتعلم حاجتنا .. فاعطِنا سؤالنا ..وتعلم ما في في نفوسنا .. فاغفِر لنا ذنوبن

اللهم انا نسألك اٍيمانا يباشر قلوبَنا .. ويقينا صادقاً حتى نعلم وانه لن يصيبنا الا ماكتبته علينا والرضا بما قسمته لنا يا ذا الجلال والاكرام

اللهم ان هذا خلق جديد .. فافتحه علينا بطاعتك .. واختمه لنا بمغفرتك ورضوانك .. وارزقنا فيه حسنة تقبلها منا .. وزكها وضّعفها لنا وما عملنا فيه من سيئات فاغفر لنا انك غفور رحيم .. ودود كريم

اللهم انا نعوذ بك اليوم فأعِذنا .. ونستجيرك اليوم من جهد البلاء فأجرنا .. ونستغيث بك اليوم .. فأغثنا .. ونستصرخك اليوم على عدوك وعدونا فأصرخنا .. ونستنصرك اليوم فانصرنا .. ونستعين بك اليوم على أمرنا فأعِنا .. ونتوكل عليك فاكفنا .. ونعتصم بك فاعصمنا .. وآمنا بك فأمِّنا .. ونسألك فاعطنا .. ونسترزقك فارزقنا .. ونستغفرك فاغفر لنا .. وندعوك فاذكرنا .. ونسترحمك فارحمن

اللهم أعز الاسلام والمسلمين ، اللهم أعز الاسلام والمسلمين ، اللهم أعز الاسلام والمسلمين وأذل الشرك والمشركين .. ودمر أعداء الدين .. واحمِ حَوزة الاسلام .. يارب العالمين

اللهم انصر اخواننا المجاهدين في سبيلك في كل مكان .. اللهم وحِّد صفوفهم .. واربط على قلوبهم .. وسدد سهامهم وآراءهم وانصرهم على عدوك وعدوهم .. ياقوي يا عزيز

اللهم انصر اخواننا في فلسطين على اليهود الغاصبين ، اللهم انصرهم على اخوان القردة والخنازير
اللهم عليك باليهود ومن هاودهم .. وبالنصارى ومن ناصرهم ... وبالشيوعيين ومن شايعهم
اللهم انزل عليهم رجزك وعذابك اٍله الحق
اللهم انزل بأسك الذي لايرد عن القوم المجرمين

اللهم انصر اخواننا المستضعفين والمضطهدين في دينهم وأعراضهم وحُرُماتهم .. يارب العالمين

اللهم انصر اخواننا في الشيشان على الروس الظالمين .. اللهم عليك بالروس فانهم لا يعجزونك
اللهم منزل الكتاب ، مجري السحاب ، هازم الأحزاب .. اهزم اليهود والروس وأرنا فيهم عجائب قدرتك يارب العالمين .. اللهم أرنا فيهم يوما أسودا كيوم فرعون وهامان وأبي بن خلف .. يارب العالمين

اللهم أصلِح أحوال المسلمين .. اللهم أصلح قادتهم وعلماءهم وشبابهم ونساءهم

اللهم أقر أعيننا باستقرار أوضاع المسلمين في كل مكان
اللهم أصلح أحوال المسلمين في فلسطين والسودان والجزائر والعراق وأفغانستان وكشمير والبوسنة والهرسك

اللهم أصلح أحوال المسلمين في كل مكان
اللهم أصلح أحوال المسلمين في كل مكان
اللهم أصلح أحوال المسلمين في كل مكان ... اللهم آمين
وصلى الله على سيدنا محمد وعلى آله وصحبه وسلم

لما تلاقى نجوم السما مليان ايمان

2009-08-21T01:34:00.003+02:00

لما تلاقى نجوم السما مليان ايمان
واما تلاقى الخير والحب فى كل مكان
واما تلاقى هلال نور فى السما فرحان
يبقى بعوده رجوعك لينا يارمضان

اكيد كلكم فرحانين برمضان زيى انا بعتبره شهر الرضا ,الرضا عن النفس وعن الناس وعن الطاعه فعلا شهر الرضا
يارب يجعلنا من المقبولين فيه ان شاء الله واكيد مش هوصيكم على كثرة الطاعه فيه واوصيكم ونفسى بالدعاااااااااااااااااااااااااااااااااء
ويارب يارب نكون ممن يجاب دعائهم
كل سنه وانتوا طيبين وجميع المسلمين بكل خير ودايما مجتمعين على حب الله وطاعته يااااااااااااااااااارب

لو بطلنا ناكل...... هنعيش

2009-07-26T17:19:00.001+03:00

أسعد الله مسائكم جمهورى العزيز أهو أنا لما بقول جمهورى دى بحس ان طالعه على المسرح اغنى ههههه
طبعا عدت مع رحله مريرة ومليئه بالصعوبات والاحساسات والمشاعر الفظيييييعه مع الامتحانات
بجد اول مرة ألمس حتة ان النجاح مش بالساهل حسيتها اوى اوى السنه دى
بس الحمد لله نجحت وجبت التقدير الشعبى (جيد) واخويا زاللنى وكل شويه يقولى تجيبى جيد يامايله هههههه بصراحه نادر اخويا ده مش عارفه عاوز منى ايه؟ اينعم انا مفرحتش خالص لما عرفت النتيجه معرفش ليه؟ والاغرب ان كان عندى حالة اكتئاب شنيعه برده معرفش ليه؟ لدرجه ان اخواتى مش مصدقين ان نجحت يعنى لولا ان نادر اخويا كان معايا وروحنا شفنا النتيجه مكنوش هيصدقوا ان نجحت بسبب الحاله النفسيه اللى كنت فيها
*اهم حاجه ان طلعت بالموضوع ده بشويه هدايا , يلا كل امتحانات وانتم طيبين.

( معلشى ياجماعه عاوزة منكم طلب قبل ماأبدا فى حلقة النهارده انكم تقرأوا الفاتحه للكاتب الصحفى محمود فوزى وتدعوله بالجنه لانه بجد اخر الرجال المحترمين حقيقى زعلت جدا جدا بوفاته لكنه وديعة الله واستردها ولا نقول الا مايرضى الله انا لله وانا اليه راجعون)

************

بسم الله نبدا حلقة النهارده
الموضوع ومافيه كنت ماشيه مرة من قدام عصارة قصب وبعدين ايه..... فيه اتنين ماشيين واحده عاوزة تشرب عصير قصب راحت التانيه قالتلها لا اسكتى ده بقوا بيعصروه بالسوس بتاعه هههههه, وماله السوس ياستى ده حتى بقى فيه الشفا
نسيب عصير القصب وندخل على العيش يقولك لا متاكلوش العيش هو انتوا متعرفوش ان القمح بقى فيه مواد مسرطنه وسوس برده بس سوسه مختلف عن سوس القصب اكيد ده طعمه احلى هههههههههه.
انا بقى لما النسكافيه يخلص اقول لبابا يشتريلى يقولى ايه ياسمر انتى مسمعتيش معتز ومنى الشاذلى وهما عملوا تقرير عن النسكافيه انه فيه اضرار جمه وبيعمل بلاوى هههههههه
اجى اشرب كولا يقولى ايه انتى مسمعتيش انها بتعمل هشاشه وكمان بيصنعوها من الخنازير
قلت طب بلاها دول واكل برجر يقولى هو انتى مسمعتيش ان لحم الخنازير هو اللى ماشى اليومين دول فى السوق , طب خلاص نمشيها فراخ يقولى هو انتى مسمعتيشس ان انفلونزا الطيور لسه لازقه فى مصر ومش هتطلع غير بالتنر هههههههه
طب نيجى فى شم النسيم, طبعا انا كرهت الفسيخ قلت نمشيها رنجه يقولى هو انتى مسمعتيش؟؟؟؟؟؟؟؟؟؟؟ لالالالا انا بطلت اسمع من زماااان
لا اله الا الله ...... بالله عليكم هنعمل ايه انا الحمد لله كرهت الاكل من زمااااااااان ولو طالت والله الجوع احسن
اهو سبحان الله دلوقتى بقى فيه قمة المساواه بين الفقراء والاغنياء الاتنين معدتوش بياكلوا الفقير واهومش معاه فلوس يشترى الاكل والغنى معاه الاكل بس مش معاه نفس تاكل الاكل ده
طبعا انا اتخنقت من منى الشاذلى ومعتز ومحمود سعد هما عاوزين مننا ايه؟؟؟؟؟؟؟؟؟ خلاص احنا هنبطل ناكل وخلاص
نفسى بس فى طلب من وزير الصحه ياريت سيادته يتكرم ويتعطف علينا وينزلوا قايمه بالاكل اللى ينفع للاستعمال الادمى بس علشان نعرف هناكل اييييييييييه؟؟؟؟؟؟؟؟؟
يلا انتهت الحلقه..... ودام الجوع علينا جميعا ههههههه احنا ممكن نمشيها شاى بالياسمين.....

مواقف ....وطرائف

2009-06-25T23:23:00.000+03:00

مساء الخير عليكم ياكتاكيت هههههه خدوا بالكم احسن انفلونزا الطيور مش سايبه حد حتى الكتاكيت
النهارده هنقسم البرنامج 3 فقرات هنتكلم عنهم لانه مينفعش بصراحه اسكت احسن ممكن افرقع من الغيظ
وبعدين نعمل زى منى الشاذلى ماهى بتجيب اكتر من فقره وقلنا هى منى يعنى احسن مننا فى ايه علشان بتيجى على دريم طب مااحنا كمان بنجى على الانترنت ههههههههه
المهم نتكلم بقى عن اول موضوع وهنستضيف فيه ضيفنا المحكوم عليه بالاعدام هشام طلعت مصطفى . عمركم شفتوا حد بيجيب ضيف محكوم عليه بالاعدام هههههههه مش بقولكم لازم نجيب كل ماهو جديد فى عالم الفن قصدى فى عالم الجريمه.
طبعا انتوا عارفين انه المفتى ربنا سهله ووافق على حكم الاعدام المهم بقى عاوزينه يتعدم, هما بيعذبوه ولا ايه؟ بجد القضيه دى كانت شائكه بشكل غريب وكثرت فيها الاقاويل ولا حد عارف حاجه ولا فاهمين هو فيه ايه؟
دخلت ابحث عن القضيه وشوفوا ايه حصل لقيت ايييه النت ملىء وايمن نور يطلع مش عارفه فى جريده ايه ويتسائل عن بعض الامور المشكوك فيها ههههههههه وساب احنا نجاوب كان ناقص يعملنا فيها عمو كرومبو ويقول اللى يحل الاسئله ياخد 100 جنيه وفوقيهم حكم بسنه سجن ماهما بقوا خبره هههههههههه
والاقى ناس عاملين على الفيس بوك جروبات اللى يقول جروب هشام طلعت وبراءته والتانى مصمم انه يتعدم وحاجات غريبه وعبيطه وتحسوا ان احنا اتنقلنا فجاه على كوكب المريخ
واللى يقولك اصله كان بينه وبين سوزان علاقه عاطفيه طب انا مالى بينهم علاقه عاطفيه ولا حتى تعاقديه انا مااااالى؟ ايه اللى هستفيده لما اعرف مش فاهمه
والله ولا روايات رجل المستحيل بتاع ادهم صبرى هو انا مش عارفه بصراحه الروايات دى كان ايه حكايتها بس عمار اخويا كان بيحبها
المهم انا اللى مضايقنى فى الموضوع ده هو انك تلاقى واحد دماغه فيها ربع ضارب والتانى بايش والتالت حاطت عليه كاتشب وماينويز كتير هههههههه ويجى يعملك مانشيت طويل عريض فى الجريده ويجيب كلام غريب وعجيب واحنا واقفين بنتفرج لا عارفين الراجل قتل ولا هواللى حظه اسود ولبست فيه بكل الادله اللى يغيض ان بعض الصحفيين عاملين زى القطه اللى بتمسك فار مش عاوزة اقول تشبيه تانى احتراما للصحفيين المحترميين انا مع حريه الصحافه ماشى لكن بادب مش ادخل فى اعراض ناس واجيب كلام ممكن يكون لا اساس له من الصحه واظبطه واحط عليه شويه شطه وبهارات والناس تتظلم فى الموضوع ده وتلاقى جايب قصص وحواديت وبعيدا تماما عن القضيه اصلا
انا ملاحظاتى بس على رجال الاعمال ان اغلب الجرائم اللى بيرتكبوها بتكون رشوه ,غسيل اموال, نصب حاجات من دى لان بيكون تفكيرهم راسمالى جدا فصعب قوى انهم يضحوا بالجاه والمال ويروحوا يقتلوا علشان علاقه عاطفيه ولا كلام من ده لكن ده مش معناه ان هشام مظلوم انا بقول كل شىء وارد اما رأيى فانا مع الشعب احب اكون حياديه لا مع ولا ضد بس نفسى الناس تهدى شويه ويبطلوا الشائعات الكتيره دى والغريب ان الناس بتحب اوى الحواديت دى والاغرب كمان انهم يومين وتلاقى كل حاجه راحت فى خبر كان وندخل فى قصه تانيه زى ماتشات المنتخب مثلا والكلام اللى تقال على الاعيبه هههههههه مش بقولكم حسيت ان احنا اتنقلنا فجاه لكوكب المريخ واللى مزعلنى بقى اكتر ان مدينة الرحاب ومدينتى طلعوا ملك لهشام طلعت وانا كنت بحلم اسكن فيهم ههههههه يلا اهى جت من عند ربنا وقلت هنروح نعيش فى مكان صاحبه اتعدم

فااااااااصل ونوااااااااصل
معلشى الفاصل شكله طول اصل قلت انزل المنصورة اغير جو وارجع هههههههه وقلت اسيبكم تتفرجوا على space toon على ماارجع شفتوا توم وجيرى فظييييييع بموت فيه ولا تويتى يااااربى
المهم الموضوع التانى اللى عاوزة اتكلم فيه رفعلى الاكتئاب تانى من بعد ماكنت هديت شويه. الاصدقاء نفسى اعرف الناس شايفه الصداقه ازاى والصديق بجد هو مين؟ انا شخصيا شايفه انها حقوق والتزامات على الطرفين كانه عقد بالظبط واللى مش اد الصداقه ومسئوليتها يقعد فى بيتهم احسن.
الموضوع ان فيه ناس تعيش معاهم ايام جميله خصوصا ايام الجامعه بنقعد مع بعض من 8 الصبح لحد 3 العصر يعنى تقريبا بنقضى نص اليوم مع بعض انا كنت بقعد مع صحباتى اكتر من بابا وماما وخرجنا كتير وضحكنا وبكينا وعشنا اجمل ايام بالمعنى الكلمه بس للاسف الايام بتلف وتبين لنا امور كتير مش بناخد بالنا منها بيبان الصديق بجد واللى كان صديق دراسه مش اكتر
بس اكتشفت اخيرا ان اغلب الصداقات الناجحه هى البعيده عن جو الدراسه تماما لانه بتكون بعيده عن اى مصالح وبالتالى بنصاحب بعض علشان احنا محتاجين بعض فعلا
اللى مزعلنى بجد ان الايام بتبين لينا حقائق متعبه ومكنتش اتخيلها وكمان ان الايام الحلوة تتنسى بسرعه كده, فعلا شىء متعب بجد. الحمد لله ربنا من عليا باصدقاء صالحين بس للاسف اصدقاء الجامعه اغلبهم بخ طاااااااروا هههههههه
يلا محدش بياخد اكتر من نصيبه خيرها فى غيرها انسوا انسوا

ندخل بقى على اهم موضوع, الفقره دى هستضيف المذيعه اللى هو انا يعنى شفتوا بقى اهو ده الجديد بعينه مذيعه تستضيف نفسها هههههههه
طبعا اغلبكم عارف ان احنا كنا فى ايام امتحانات وايام لا يعلم بها الا الله. كنت عاوزة بس اقولكم على اللى حصل والله كاننا كنا فى برنامج طرائف وعجائب . اول يوم امتحان مش عاوزة اقولكم كان فيه سحابه سوده اسود من التمر الهندى عدت على الدفعه كلها هههههه ندخل خير اللهم اجعله خير نلاقى الدكتور جايب السؤال الاول اللى عليها اكتر من نص الدرجه يعنى لازم نحله علشان ننجح نلاقيه جايبه من مكان غريب وعجيب ههههه اه والله من اخر موضوع فى الكتاب وموضوع مينفعش يجى تحريرى اصلا ومحدش كان زاكره وفين ناس مركزتش فيه اول ماشفت الامتحان قعدت اضحك والله وعشر دقايق ولقيت نص اللى موجودين خرجوا وسابوا الامتحان وصحباتى كلهم خرجوا قلت ابص تانى على الامتحان يمكن مش واخده بالى اينعم هو كان غبى لدرجه لا توصف ولا تكتب هههههه بس قلت ياانا ياهو فضلت اعصر فى دماغى لما جبت شويه كلام وكان معاهم شويه نسكافيه ههههه من كتر ماشربته
المهم نروح الامتحان اللى بعديه الاقى نص الدفعه اجلت الامتحانات . ليه كده ياجمااااعه؟ كنتوا جربوا وشوفوا حظكوا بس بعد ماخلصت امتحانات قلتلهم والله احسن انكم مجتوش .ايييييه ده ,ده امتحان ده ولا اكراه معنوى والاقى الامتحان التانى الدكتور جايبلى عنوان الكتاب اكتبه يقولك مستعينا بخطه خطة ايه, الخطه الخمسيه هههههه,والله حسيت ان الدكاترة مش طبيعيين بصراحه كانوا شويه امتحان انا شايفه الواحد يروح يجاهد فى غزة اهون
والله الواحد شرب كمية قهوه ونسكافيه لما بقيت اد صوباع الموز,وبعدين ايه كمان بابا وماما بيظبطونى وبابا كان مروق عليا فى عيد ميلادى وجايبلى تورتايه شكلى بعد النتيجه هدفعله تمنها هههه
اعتقد انه بعد النتيجه بابا هيقولى يابنتى هاتى الفلوس اللى دفعتها كلها وخلاص هههههه كل شويه اقوله يابابا يعنى انت من رايك ممكن انجح ,يقولى ان شاء الله هتنجحى اقوله ايه يابابا انتى بتاخدنى على اد عقلى يقولى يعنى عوزانى اقولك ايه طب خلاص مش هتنجحى ههههه
تخيلوا لو منجحتش شكلى هيبقى ووووحش قدام العيله المالكه, لا وايه كل مايسالوا عليا راحه فين ياسوسو راحه اجيب اومو هههههه قصدى راحه الكليه جايه منين ياسوسو جايه من الكليه وعامله فيها ولا ابوتريكه فى تدريباته
على راى ام بيدى بتقولى انا واخوكى هنطلع على الحرم وندعيلك فى المايك والامه الاسلاميه تأمن ورانا ههههههه يمكن ننجح .بجد ربنا يستر احنا واخدين الموضوع بهزار بس وقت الجد فيها رقاب هطير على طول

نسيبنا بقى من الامتحانات والصداع ده
هحكيلكم عن الكام موقف دول
بابا وهو بيلبس العبايه بسرعه علشان يلحق الصلاة فى المسجد وبيحطوا المفاتيح فى جيبه تخيلوا لقى اييييه؟ مش هتصدقوا لقى عصفورة ههههههه اه والله بعدين فضلت تطير شويه وهى كانت صغننه خالص وقلت بالله عليك امسكها علشان اشوفها وبعدين هى كان شكلها غريب كده ولونها اسود فى بنى معرفش ازاى وبقوله ايييه ده يابابا هى غراب وعامل نفسه عصفورة ولا ايه. هههههه قالى انتى يابت عبيطه ولا ايه. حسيت انه بيقول فى سره ياربى رزقتنى ببنت عبيطه ههههه بابا بقى وبيرفع من معنوياتى
الموقف التانى وانا فى المنصورة شفت واحد لابسه بنتاكور ولا بسه حجاب ازاى الله اعلم .صحيح البنتاكور ده اللى ميعرفوش هو بنطلون بس قصير شوييتن يعنى بطبق السنه فى البنطلون هههههه لا حول ولا قوة الا بالله
حقيقى الله يهدى بنات المسلمين جميعا
المهم كفايه عليكم كده انا شخصيا اتخنقت والجو حر ومشطشط ههههههه يلا مستنيه تليفوناتكم على رقم البرنامج وايميلاتكم على البوسطه هنا على البلد ههههههه

مغلقة.......حالة اكتئاب

2009-06-18T17:20:00.003+03:00

هما دووول المصريين

2009-06-16T00:15:00.001+03:00

مسااااااء الخيييييريااأجيال الغد
انا قلت أدخل أعمل حلقة خاااااصه عن مااااتش المنتخب النهارده مع البرااااازيل كان فظيييييييييع مينفعش نسكت ابدا عن هذا الحدث التاريخى
قلت اعمل زى وائل الابراشى لما عمل حلقه خاصه عن قضية هشام طلعت يعنى وائل احسن مننا فى ايه؟
بس حقيقى النهارده المفروض نرفع القبعه للمنتخب حقيقى حقيقى كانووااا راااائعين جدا حاجه كده تفتح النفس مش الماتش اللى كان مع الجزائر اللى رفعلنا الضغط كان ماتش فى منتهى البروووود حتى الاجوال نفسها كان بااااارده ورخمه أمر من حلقات عمو كرومبو والله والمهم انه كان ليلة الامتحان قلت يعنى هى نقصاكم الماده كانت نيله وتيجوا تكملوا علينا ههههههه بس الحمد لله كله بيعدى

بس النهارده المفروض هيكل يكتب عنه فى التاريخ لانهم لعبوا بضمير
على رأى محمد أخويا كل لما كنت اعمله حاجه مش حلوه يقولى هى قلة الضمير ههههههههههههههه فعلا الواحد لما يعمل حاجه بضمير واتقان بتكون النتيجه مختلفه تماما
عموما ننتظر الباقى ونشوف اخرتهم اييييه؟
وربنا معاهم ومعانا ويبطلوا يجيبوا الماتش ليلة الامتحان

دبرنى ياوزير

2009-06-08T14:01:00.000+03:00

أسعد الله مسائكم ولا صباحكم مش هتفرق جمهورى العزيز
النهارده جايه وجيبالكم معايا شيكولاته علشان اللى يجاوب كويس هديله واحده ماشى....
الموضوع ومافيه انه وانا فى ثانويه عامه طبعا كنا بندرس كيمياء طبعا انتوا عارفين موضوع الدراسه العملى ده مستبعد من نظام التعليم فى مصر المهم جه فى مره المدرس بتاعنا وطلبت معاه يعمل تجربه كان الناتج من التجربه H2s وماأدراكم مارائحة H2S ماأنزل الله بها من سلطان الواحد يشم هيروين ولا يشم ريحته عافانا الله واياكم من الهيروين ومشتقاته ومن H2s وغازاته المهم دلوقتى حد هيسالنى انتى فاكره ايه فى الكيمياء اقولكم والله العظيم مافاكره حاجه غير التجربه دى واللى عملتلى حساسيه فى الجيوب الانفيه اخدتنا ايه احنا دلوقتى من الكيميا غير الحساسيه
وهنا جه فى دماغى ان اتكلم عن نظام التعليم عندنا عارفه اكيد هتاخدوا نفس عميييييق وتنهيده طالما جبت سيرة التعليم اينعم انا عاوزة ادخل وزارة العدل بس عادى هقترح على وزير التربيه والتعليم الاراء دى لانه من العدل ان يكون فيه تعليم كويس وبعدين مااحنا فى مركب واحده ياتنجينا ياتغرق بينا......
فقلت ايه اعيد تنظيم العمليه التعليميه كلها من المرحله الابتدائيه نهاية بالتعليم العالى فقلت نعمل ايييييييييييه؟؟؟؟
ولا اقولكم نروح فاصل الاول

عدنااااااا..... بعد شويه الفواصل دى خصوصا اعلان سفن اب يالذيذ رااايق حته اعلان ملوش حل سيبك انت مزمز ميرندا ههههههههههه ده انا لو وزيرة اعلام اول حاجه هعملها هنزل قرار بابادة جميع الاعلانات
خلونا بقى فى موضوعنا بصوا بقى هااااااا شفتواااا حاجه ههههههه احنا نبدا الاول
المرحله الابتدائيه: من رايى الطالب يدرس فيها 4 مواد بس من اول سنه اولى حتى سنه خمسه ونلغى سادسه دى اللى ملهاش لازمه اصلا
حد هيسالنى طبعا ايه هى المواد دى؟؟؟ (اللغه العربيه طبعا والانجلش والرياضيات والقرآن)بس بحيث ان الطالب فى فترة الخمس سنين يكون exilant فيهم اما نظام الامتحان ده اول حاجه هعملها انه يتلغى طبعا نظرا للايام السودويه اللى بنمر بيها بسبب الامتحان فانا اصبحت ضده تماما ده غير ان الامتحان كشف عن فشله الذريع فى معرفه قدرات الطالب وتقييمه لان فيه ناس اصلا مش بتفرق معاهم امتحانات ولا غيره وفيه ناس بتنجح لان قوة حفظها قويه لكن بيكون مش فاهم اى فى اى حاجه كام كلمه يروح يرميهم فى ورقه الاجابه ويروح يلعب كوورة ولا راكت وكان الله بالسر عليم وهكذا......طب

هتقوليلى هنعمل ايه ؟هقولكم يكون نقل الطالب من سنه دراسيه لاخرى تبعا لتتقيم المدرسين ولازم طبعا هنستعين بخبراء فى التنميه البشريه دوال اهم مافى الموضوع وطبعا لازم يكونوا المدرسين عندهم ضمير فانا بفترض المدرس علشان يشتغل لازم يكون معاها على الاقل الماجستير ههههههههه طبعا هتقولوا هنوقف حالهم بس هو لازم علشان يستاهلوا المكانه اللى هيكونوا فيها بس ده مع رفع أجورهم ل 3000 ولا حاجه عارفه انه حلم بس مش لو بطلنا نحلم هنعيش الواقع المؤلم يبقى الحلم احسن ولا ايه؟
ندخل بقى على المرحله الاعداديه: الطالب هيدرس هنا ايييه 5مواد(طبعا لغه عربيه وانجلش ورياضيات والقران طبعا واخييرا التاريخ) هتقولولى اشمعنا يعنى التاريخ لان اللى ملوش تاريخ لا ليه حاضر ولا مستقبل ويفهموا التاريخ كما يجب ان يكون مش شويه جغرافيه على شويه كلام عبيط معرفش جايوه منين ويقولو هو ده التاريخ ده كده اسمه (فش فى الاش) ههههههه معرفش يعنى ايه بس بسمعها كده

هنيجى بقى لاهم مرحله واصعبهم فى نفس ذات الوقت المرحله الزفتاويه قصدى الثانويه اللى كانت شووورتها باميه وقلبت دلوقتى للملوخيه ههههههه معلشى اصل بحب الملوخيه
هنا بقى النظام هيختلف شويه انا طبعا قلت من شويه لازم هنستعين بخبراء فى التنميه البشريه دورهم هنا اكبر لان عن طريقهم هقدر اعرف ميول الطالب اجتماعيا وفكريا وثقافيا وعليه اقدر احدد ايه اكتر المواد اللى بيحبها
من هنا اقدر اقسمهم مجموعات مجموعه للمواد العلميه(يدرس الاحياء ومواد من طب وصيله وعلوم بس بشكل مبسط طبعا بحيث يتماشى مع تفكيره وعقله)بكده لما هيدخل كليه من دول مش هيتصدم زى ماكلنا اتصدمنا لانه هيكون دارس بشكل مبسط عن كليته قبل مايدخل بس لازم نكون متاكدين انه فعلا بيحب المواد دى وانه تركيبته الكيميائيه ههههههه كلها مواد علميه
مجموعه تانيه تكون للحسابات(يعنى يدرس فيزياء ورياضيات وياخد برده شويه من مواد هندسه على شويه من الفيزياء اللى بياخدوها فى الكليات التانيه فى تربيه مثلا) وهكذا.......
اه صحيح ومجموعه تانيه تدرس مواد الفقه والشريعه لانه هنلغى نظام التعليم الازهرى وكلياتهم تدخل ضمن التعليم العالى احنا عاوزين البلد كلها تبقى فقيهه
اعتقد انه كده نكون ضربنا عصفورين بحجر زى مابيقولوا منه انه درس المواد اللى بيحبها علشان يقدر يعطى فيها كل ماعنده وبرده هيكون دخل الكليه اللى بيحبها وبالتالى كل واحد هيبقى عارف هو عاوز ايه بالظبط وهيعمل ايه بعد مايخلص كليه مش نسيبها دايما للاقدار ونقول زى ماربنا يمشيها اوك انا مقلتش حاجه بس لازم نفكر صح علشان نمشى صح
خلصتى حلقة النهارده تصوروا هبط ههههههه يلا عاوزة اشوف ارئكم ومقترحاتكم فى الموضوع ده يمكن نعرف نغير حاجه
مستنيه مكالمتكم على تليفون البرنامج اللى انا اصلا نسيته ههههههه وابقى اسالوا بقى عليه
كانت معكم سمسمه من عالم سمسم وفلفل واى حاجه فيها زيوووت هههههههه

الفراق مكتوب علينا

2009-05-14T20:28:00.001+03:00

أسعد الله مسائكم جمهورى العزيز انا قلت اعيد بث البرنامج علشان خاطر جمهورى ومنقدرش نرفضلهم طلب هههههه
وحشنى جدا البرنامج والله بس نقول ايه للايام اللى بتفرقنا ؟؟
المهم انا جيتلكم المرة دى بموضوع درامى شويه قلنا نبعد عن القانون والسياسه والكلام اللى مش جايب همه ده
فقلت نقلبها دراما وخلاص ........
سؤالى ليكم بقى ايه اصعب احساس فى الدنيا ممكن نواجهه؟ اكيد هتختلف الاراء البعض هيقول الكره والبعض يقول الخيانه وفيه اللى هيقول الغدر من اعز الناس وتتباين الاراء زى محمكة النقض بالظبط هههههههه بس المهم نستقر على رأى
انا بقى اقولكم اصعب احساس فى الدنيا من وجهة نظرى الشخصيه هو الفراق .......حقيقى مشفتش لسه ولا هشوف اصعب منه
يلا بقى عاوزين نقلبها عيييط كتييير بس حاسبوا احسن المدونه تغرق بينا هههههههه ......انا عارفه مينفعش اكون بتكلم عن الفراق واضحك بس احيانا بيكون الضحك هو الطريق الوحيد اللى يخرجنا من الحاله دى
ماعلينا من موضوع الضحك ده خلينا فى الفراق هههههههه المهم اسيبكم مع التقرير الجاى هعملكم بقى زى منى الشاذلى ههههههه قصيده عن الفراق هى مش قصيده بالمعنى الدقيق بس اهو كلالالام هههههه

الفراق مكتوب علينا
مهما روحنا ومهما جينا
الفراق مكتوب علينا
مهما قلنا ومهما حكينا
ده الفراق مكتوب علينا
ليه يادنيا بتأسى علينا
وتفرقينا عن بعضينا
استحملنا كتير ولا شكينا
بعدنا عن حبايبنا وأهالينا
ده احنا ياما قلنا وغنينا
ان الفراق مكتوب علينا
طلع الفراق أظلم حكم كان علينا
ليه يادنيا بتأسى علينا
وتفرقينا عن بعضينا
نفسى نرجع تانى لبعضينا
وتجمعنا الحدودته و الغنيوه
لو كان الزمان يرجع بينا للى فات
لكن ايامنا بقت شريط من الذكريات
ادينا يادنيانا عايشين
على اهات الذكريات
يادنيتنا متأسيش علينا
ده احنا جرينا جوه حضنك واستخبينا
حمعينا تانى يادنيانا
على الحب والامان والطمانينه
ومتكونيش قاسيه كده علينا
ده الفراق مكتوب علينا......
رجعتلكم بعد التقرير الحززين ده يمكن فعلا شىء صعب اوى نفارق اللى بنحبهم لكن الاصعب انك تكون خايف ومرعوب من اليوم اللى ممكن تفترقوا فيه
احساس قاسى جدا لما تكون عاجز تعمل اى حاجه لاعز الناس وخايف اوى من فراقه بس للاسف متقدرتش تعمل حاجه وفى النهايه لازم هتفترقوا
تتعدد الاسباب والموت واحد وهنا برده ايا ماكان السبب بس النتيجه واحده وهى الفرااااق
ولو قلنا ندعى ونقول يارب متفرقناش عن حبايبنا يبقى بنضحك على نفسينا ؟؟ اصل الفراق مكتوب علينا........

لا تناقش ولا تجادل ياأخ على

2009-04-25T00:24:00.000+03:00

سلام الله عليكم جميعا ياقوم
كيف حال الأوس والخزرج هل هما معنا ام علينا ههههههه
ايه الاخبار بعد تغيير التوقيت ؟ احلى حاجه فى مصر والحاجه الوحيده اللى فيها تغيير وكسر للروتين الممل تغيير التوقيت؟ ولا ايه رايكم؟
المهم نبدأ حلقتنا النهارده
أسعدالله مسائكم جمهور برنامجى الشهير سمسمه والحياه
والله موضوع النهارده انا حبيت اتكلم فيه لان متغاظه منه بشكل مش ممكن
الموضوع ومافيه ان المحاضره اللى فاتت بتاعتى اه نسيت اقولكم ان انا بعمل دبلومه فى القانون الجنائى ليه معرفش؟ عملت فيها عبدالستار صبرى وقلت لابد نكمل دراسات عليا وقد كان
المهم بقى محاضرتى كانت فى الحصانات؟ طبعا عارفين يعنى ايه حصانه
اللى لفت انتباهى كان مايسمى بالحصانه الدبلوماسيه طبعا مشاهدين البرنامج يحبوا يعرفوا تطلع ايه الحصانه الدبلوماسيه دى؟
ان رئيس الدوله الاجنبيه لو عندنا فى مصر مثلا بيكون له حصانه ضد اى جرائم يرتكبها وكمان ايه مش له لوحده ده كمان للاسره الكريمه والحاشيه ليه متسالوش؟
ويعلل ذلك بالمبدأ المعروف فى القانون الدولى انه ليس للمتساويين سلطان لاحدهم على الاخر
وهذه الحصانه ايضا يتمتع بها الممثل الدبلوماسى وكذلك اسرته
هقولكم مثال يعنى جورج بوش مثلا( عليه من الله مايستحق) لما كان رئيس دوله وجه عندنا مصر وضربت معاه كده ومزاجه طلب يقتل 5 مصريين مثلا عادى ولا حاجه ولا حد يقدر يعمله حاجه لانه عنده حصاااااااااانه؟
ده انا لو كنت رئيس جمهوريه وده مستحيل طبعا كنت اصدرت قرار باعدامه فى ميدان عام رميا بالصرم(الشوزات يعنى) ولو ان بوش اتعود على موضوع الشوز ده
خلاص احنا ممكن نبقى نعمل تركيبه ونرميها عليه مكونه من كلوريد صوديوم وفسفورابيض وغاز الميثان وحمض نيتريك بس خلى بالكم احسن تفرقع فى وشكم وانتوا بتعملوها هههههههه
ولو قالولكم انتوا استعملتوا مواد محظورة نقولهم محدش احسن من حد مااسرائيل استعملت الفسفور الابيض وماخدتناش منها لاحق ولا باطل
فااااااااااصل ونعووووود.....
...........
...............
أسعد الله مسائكم من جديد
احلى حاجه الفواصل دى هههههه حقيقى هترفعلنا الضغط قريب خدوا بالكم اصل الضغط ماشى اليومين دول فى البلد
المهم نكمل حلقتنا خلصنا من الحصانه الدبلوماسيه وندخل على الحصانه البرلمانيه كلنا طبعا نسمع ان العضو البرلمانى المحترم بيدخل مجلس الشعب علشان الحصانه
وحجة المشرع فى توفير الحصانه لعضو البرلمان هى انه يقدر يمارس عمله بحريه
عاوزه بس افهم منين المشرع يقولنا المواطنون امام القانون سواء ويرجع تانى يمنح البعض امتيازات
ايه التناقض الغريب ده
وفعلا صدق عادل امام لما قال فى فيلمه لاتناقش ولا تجادل يااخى على؟ هههههههه
هو مين على ده؟
انا عارفه حلقة النهارده كانت دسمه شويه بس حقيقى الموضوع يضايق اوى جدا خالص
يلا اشوفكم على خير ومنتظرة تليفوناتكم على رقم البرنامج او الرسايل عبر البريد الالكترونى
كانت معكم سمسمه من أمام الكمبيوتر قطاع الاتصالات قناة السويس هههههه قصدى قناة الساعه

أمى الحبيبه

2009-04-19T04:48:00.002+02:00

صباح الخير يااولاد عاملين ايه النهارده فى الجو الحار البرد ده ههههه مش عارفه ازاى بس هو كده وخلاص عموما انا خليت المدونه بتاعتى بحرى علشان الطراوة الواحد بيتخنق بسرعه ههههههههه وحاطه تكييف ومظبطاها.

انا بعد ماصليت الفجر كده زى الناس العاديين يعنى لقيت نفسى مصممه ان اكتب الموضوع ده

والله نفسى دى بقت بتطلب منى حاجات غريبه اوى هههههه ماعلينا نفسى بقى اعملها ايه

ومن هنا ومن ارض المدونات العربيه والعالميه برده مفيش مانع

تحدثكم سمسمه فى أولى حلقات برنامجها الشهير والمعروف على ارض الوطن العربى سمسمه والحياة

طبعا محدش سمع عن برنامجى ده؟ ههههههه بس على فكره هو اشهر من برنامج قلم رصاص بتاع حمدى قنديل

بس احنا اللى مش بنقول ههههههههه

المهم خلينا فى حلقتنا وبلاش نجيب فى سيرة حد احنا لسه مخلصين صلاة

زى ماانتم شايفين كده من اسم الموضوع حبيت اول حاجه اكتبها تكون لامى الحبيبه بصراحه هى ياماعملت لينا فقلت نعملها اى حاجه بقى ولو كانت بسيطه

فى يوم من الايام وانا قاعده كده مع جدو الله يرحمه فى قاعدة صفا والنفوس صافيه ههههههه اصل جدى ده كان اسطوره ده لو كان عاش كمان شويه كان دخل التاريخ من اوسع ابوابه ههههههههه لا وايه اكيد كان محمد حسنين هيكل كتب عنه بس يلا بقى ملوش نصيب ههههههه

المهم جدو حبيبى كان بيقول احيانا حاجات جميله اوى فكانت كلمته الشهيره اللى من غيرأم حاله يغم

وصدق جدو فى ده فعلا اللى من غير ام حاله مش يغم بس ده حاله نيله خاالص

انا عارفه انه مهما قلنا من كلام مش هيوفى حقوقها علينا بس نتمنى من ربنا يقدرنا ولو نرد جزء بسيط من افضالها

طبعا هو المفروض اللى بيستضيف حد فى برنامجه يكون عايش هههههههههههه بس الجديد بقى هنا انك تستضيف ميتين مفيش مشكله ههههههههه فاصل ونواصل...........

بعد الفاصل الفظييييع ده وكم الاعلانات الرخمه وحلقات عمو كرومبو اللى ملهاش حل ده

رجعتلكم مع احلى كلام لاحلى ام فى الدنيا اسمعوا كده

بخاف عليكى

ببات أفكر فيكى.....من خوفى وقلقى عليكى

بخاف لايجى اليوم.....ومقدرشى اشوف عينيكى

بخاف من الزمن والايام......لايبعدونى عن لمسة ايديكى

حلف النوم مايلمس جفونى.....من كتر خوفى وقلقلى عليكى

فأنتى حبى وهيامى....وأنتى نبضى وشريانى

احبك ياأمى يارمز الحنان والطيبه والامان

ياكل عمرى اللى عدى والا جاى

فسامحينى يااحلى حاجه فى عمرى

فانتى الهنا والدنا ياكل عمرى اللى عدى واللى جاى

طبعا خلصت انا كلامى

مستنيه تليفوناتكم بقى علشان البرنامج يبقى طبيعى زى اى برنامج هما يعنى احسن مننا فى ايه

عاوزه اشوف ارائكم على تليفون 0900 ده تليفون البرنامج 0900 وشيل اى حاجه من على العربيه هههههههه

واخر كلامى سلام

مع حلقه اخرى من برنامجكم سمسمه والحياه

انتظرونااااااااااااا؟ بقولكم ايه قبل ماامشى طبعا متنتظروش جمب النت لحد الاسبوع الجاى على ماتيجى الحلقه التانيه ابقوا قوموا شموا شويه هوا ههههههههههه

مساااااااء الخييييييييير

2009-04-17T01:38:00.000+02:00

مساء الخير يااهل الانترنت
بداية وقبل كل شىء احب اشكر اختى وحبيبتى صمت المشاعر لانها بجد تعبت معايا على ماعملت المدونه
أينعم هى لسه تحت الانشاء ولسه متشطبتش سوبر لوكس لكن شغاله يعنى ههههههههه
انا بصراحه اتعرض عليا كتير ان اعمل مدونه لكن كنت حاسه ان مش فاضيه بالرغم ان انا فاضيه بس معرفش ازاى ماعلينا من الحتة دى
بس فجأه صحيت الصبح قصدى بعد الظهر لقيت نفسى طالبه معايا مدونه هههههههه فقلت لازم ولابد نعمل مدونه .
زهقتوا ولا ايه؟
استنوا لسه مخلصتش كلامى عيب تمشوا وتسيبونى اتكلم مع نفسى الناس تقول عليا ايه اتهبلت؟ قال يعنى كنت عاقله قبل كده هههههههه نشوف الموضوع ده بعدين
استنيتوا؟ طب كويس هههههه
نتكلم جد بقى شويه
انا بجد حسيت ان عاوزة اعمل حاجه جديده فى حياتى عامة وفى عالم المدونات خاصة
ونفسى بجد ان المدونه دى تكون لوجه الله وأحاول بقدر المستطاع ان أفيد غيرى ولو بأى معلومه بسيطه وانا كمان اتعلم منكم كل ماهو جديد فى عالم الفن هههههههههه قصدى فى عالم التدوين
صحيح قبل ماحد يعلق على اسم المدونه هو وكيلة نيابه مع ايقاف التنفيذ اصل لسه والله لم يصدر القرار بعد وهو حلم جميل نفسى يتحقق ادعولى بقى يكون قريب علشان ابقى مع التنفيذ هههههه
اتمنى اشوف تعليقاتكم الجميله واللى تشجعنى اكمل احسن ارجع فى كلامى تانى هههههههه
يلا تصبحوا على خير يأحبائى الصغار ههههههههه على اساس ان انا مامتكم تخيلوا؟ ههههههه