الثلاثاء، 21 ديسمبر 2010

خطاب الى سيادة الرئيس



مساء الشاى بالياسمين ونحلى بشوية تزوير على عيون الجماهير
اولا بجد بيوحشنى جدا الكتابه فى المدونه ومابيمنعنى عنها الا الشديد.المهم ياجماعة انا بجد كان نفسى جدا اكتب قبل الانتخابات والبنتجان اللى حصل ده واطلب منكم المقاطعه بس المشكله ان بجد مكنتش فاضيه ومكنش فيه وقت ادخل نت كنت عامله فيها بيزنس مان ,المهم قلت اسيب الموضوع لحد مااشوف هيوصل لفين ويارتنى مااستنيت اكيد المقاطعه كانت هنبقى افضل بكتير من اللى حصل.
طبعا الكل اكيد مستغرب من اسم البوست وبيقول عليا اتجننت ده اذا مكنتش بقيت كده فعلا هههه بعد نتيجة الانتخابات والحاجات اللذيذه اللى حصلت فيها (بجد حاجه تموت من الضحك)و قلت امشى على نهج احمد حلمى ف فيلمه واكتب جواب لسياده الريس محدش عالم يمكن يتغير بالخطاب شىء ولو انه معتقدش بس اهى محاوله قد تبوء بالنجاح (هههه حلوه تبوء دى)
المهم قبل مااعلق على الصوره الفظييييعه اللى فوق دى واللى استوليت عليها من الفيسبوك وكنت بقولهم لو فيه قصب فى المجلس اكيد هنزل الانتخابات الجايه ,انا اللى مخوفنى اننا ممكن نلاقى فى اخر بنش ف المجلس حد بينادى ويقول الفريسكا وواحد يقول صميد وجبنه وعجويستا هههههه ومش بعيد نلاقى كاظم داخل بيغنى ويقول فرشت رمل البحر ونامت واتغطت بالقبه وطبعا فيه بحر ورمل وشط المجلس مش هييبقى له مثيل(ولا عزاء للمجالس)

نتكلم جد شويه ياشموع المستقبل, اللى مش باين له اى لون ,المفروض ان كلنا او اغلبنا عارف اختصاصات مجلس الشعب بس نقولها تانى علشان الحبايب وهى كما جاءت فى الكاستور (قصدى الدستور)

يباشر مجلس الشعب بوصفه السلطة التشريعية اختصاصات مختلفة ورد النص عليها فى الباب الخامس من الدستور، فوفقا للمادة 86 وما بعدها يتولى المجلس :
• التشريع
• إقرار المعاهدات و الاتفاقات
• إقرار الخطة و الموازنة
• الرقابة على أعمال السلطة التنفيذية
• مناقشة بيان رئيس الجمهورية
• تعديل الدستور
إقرار إعلان حالتى الحرب و الطوارىء
طبعا بعد ماالستات احتلوا المجلس كان المفروض تبقى اختصاصات المجلس مختلفه يعنى مثلا التشريع يكون فيه مشروعات قوانين وفن الطبخ وعمل الكيك ههه
اما اقرار الاتفاقيات فدى هتكون بين النواب والنائبات علشان ميحصلش مشاكل تحت القبه وكل واحد يطلب بالمساواه فنفض الخلاف من دلوقتى ويبرموا احلى اتفاقيات
اما بقى اقرار الموازنه والخطه فبصراحه الستات متتوصاش بالموضوع ده (ده هما اساتذه تخطيط ههههه)
وعلى هذا النهج تسير اختصاصات المجلس (وعوضنا على الله)
بسم الله الرحمن الرحيم ,الى رئيس الجمهوريه ,اكتب لسيادتكم هذا الخطاب وكلى حزن واستياء لما حدث فى بلادنا ,ياريس الشعب خلالالالالاص فاض بيه ومش بعيد يقوم بثورة ,ياريس لو يرضيك ان الموجودين فى الصورة دول هما اللى هيشرعوا قوانين وهما اللى هيبرموا اتفاقيات وهما اللى هيخططوا يبقى اللى سيادتك شايفه ياريس...
لو سيادتك شايف ان دول هما اللى هيقروا بحاله طوارىء او حرب يبقى اللى سيادتك شايفه ياريس....
ياريس الشعب على اد مابيحب وطنه بجد بس ممكن يشتغلوا جواسيس قريب من اللى فيهم ياريس
ياريس لو سيادتك نزلت مش هقول فى بلدنا بس خلينا حتى فى شوارع وحوارى القاهره هتلاقى الشعب بيكمل عشاه نوم ده لو لقى فطار اصلا
ياريس الشعب خلص والامراض مسكته من الهم ده لولا انه شعب مضحك ومرح كان مات من الغيظ من زمان ياريس
ياريس ياريت تشوفلنا حل فى اللى بيحصل (على راى القرموطى معلش احنا بنتبهدل ياريس)
ياريس انا بطالب بتعديل المادتين 86,87 ,انا عارفه ان الدستور بتاعنا عاوز قرار ازاله من زمان بس بنحاول نرمم فيه اى شىء بدل مايقع فوق دماغنا وتخرب البلد خالص ونبقى زى المانيا بعد الحرب العالميه (خرااااااااااااااب)
واخيرا ياريس بالاصاله عن نفسى وبالنيابه عن الشعب المحبوب (طبعا انا عارفه ان الشعب وقت الضرب هيقولوا احنا ولا نعرفها هههه) احنا بجد بنحب تراب البلد مش البلد بس وبجد بجد نفسنا نشوفها من احلى واجمل البلاد قبل مانموت ياريس .ياريس لويرضيك اللى بيحصلنا يبقى اللى سيادتك شايفه ياريس....
وشكرا لسعة صدوركم

تنويه هام لاصدقائى المدونين ياريت تبعتولى التعليقات مش هنا لانه طبيعى بعد ماانزل البوست هكون مشرفه يااما سجن الاستاد وده يبقى من فضل الله علشان ابقى قريبه من الناس اللى هيزورونى ويااما هتنفى لحلايب وشلاتين ويااما اروح سجن ابو غريب (وهنا بس تنسونى خالص هههه) وابقوا اشربوا سفن اب يالذيذ يارايق وادعولى واترحموا عليا هههههه
وابقوا افتكروا انه انا اللى كنت عاوزة اعدل المادتين دول وتقولوا عليا شهيده الدستور وابقى اشهر من( جميله بوحريد الجزائريه )شخصيا
والسلام ختام

هناك 11 تعليقًا:

carmen يقول...

قلبتي علينا المواجع ^_^ بوست جميل تسلم ايدك

سواح في ملك الله- يقول...

يابنتي لو مش خايفة عي نفسك
خافي علي اهلك
واللا انتي بايعة القضية خالص والا
ايه
اسمعي
انا من النهاردة
معرفكيش
هههههههههههههه
تحياتي

غير معرف يقول...

ههههههههههههههههههههه ازايك يابنت بلدى ليكى عيش وحلاوة قصدى وحشة انا مع مقولتك" احنا ولا نعرفها هههه"
هههههههههههههههه ودا طبعا مع اول قلم مصر كلها هتسمع صوته ايوا طبعا بعد صوته وبعض المؤثرات الصوتية وكمان الكهربائية
وبعد كلامك ورسلتك دى وكمان للريس وصلت انك تفكرى فى رسالةوللريس يانهار كلوركس وحيثما انك هتكلى عيش وحلاوة فى قسم اول واسمحى ليا اقولك حيثما كدا فى الكلام فانا اعلانها بكل صراحة انه يابنتى ولا حد هيسمعك ولا كانت المادة 76 اتعدلت فكان بضرورى المواد اللى انتى قولتى عليها هى كمان تتعدل لكن عشم المصريين فى كيلو سكر رخيص ههههههههههههه
كل سنة وانت طيبة يارب عام سعيد عليكى

قول ياااارب يقول...

carmen
ربنا مايجيب مواجع ابدا يابنتى ده ياحبيبتى تسالى كده زى اكل القصب بالظبط يعنى الواحد بيتلذذ بالموضوعات دى مش بتجيب اى مواجع خالص ولا ليها اعراض جانبيه ههههههههه
وحشانى ياكوكو بجد وهزورك قريب ف مدونتك استنينى بقى ومتنسيش النسكافيه بتاعى ههههه
منورانى ياعسل

قول ياااارب يقول...

سواح فى ملك الله
هههههههههههه لاء انا بايعاها من زمان اما اهلى فهما اكيد هيقولوا انهم لقونى ع باب البيت ملفوفه فى قماشه بيضا على خطين حمر علشان انا زملكاويه جدا ههههههههههه
نورتنا استاذ خالد ومتقلقش المدونه واخده حصانه

قول ياااارب يقول...

thunder
ههههههههههههههه فينك من زمان يابن بلدى التدوين يناديكم عموما اشكرك جدا على التعليق اللذيذ ده هههههههههه وع رايك عشم المصريين ف علبه جبنه اسطنبولى هههههههه
المهم ايه اخبارك؟ عام سعيد عليك يارب ودايما منورانا جدا ومنتحرمش من العيش والحلاوه بتوعك
تحياتى

حياه بلا عنوان يقول...

السلام عليكم ورحمه الله وبركاته
اولا كل سنه وانتى طيبه
ثانيا موضوعك جميل قوى ومش تقلقى فى حريه دلوقتى حريه للكلام مش حريه فى الرءى لا فى الكلام بس تتكلمى وتطلعى اللى جواكى ومحدش هيعمل حاجه فااتكلمى برحتك مش تقلقى هههههههه
تحياتى

قول ياااارب يقول...

حياه بلا عنوان
وانتى طيبه ياعسل وسنه سعيده عليكى وعلى الجميع ييييييييييااااارب
اما حريه الرأى فانا قلت قبل كده الدستور كفل حرية التعبير
وانتى عارفه احنا مش بنقلق خاااااااااااااااالص سيبيها لله
نورتينى بجد ياحياه

غير معرف يقول...

ومين قال ان الحياة نفسها مش حلم ايوا هو معرض كتير اوى للكوابيس لكن بتظل حلم وكل واحد فينا بيحاول ينشئ لنفسه بداخلها حلم ايوا هو بيهون علينا حلم الحياة الاكبر او زى ما انتى قولتى اكتشافنا بان الحياة فى الاحلام افضل لان احنااللى بنصنعها بقوانينها وظروفها لكن دا مش معنه اننا نعيش بدخل الحلم وكانه اصبح امر واقع او حقيقة ساعات بنحتاج الحلم فى فترات ما فى حياتنا لكن فى الاخر بنكتشف انه حلم لا اكثر وسرابى وممكن يكون تاثيرة علينا اصعب من حلم الدنيا وحيثما انتى عايشة فى ظل العوالمة والاحلام
واسمحى ليا مرة تانية اقولك حيثما فاكيد هتصحى على حقيقة اننا بنعيش فى مصر يعنى شرطة غير مهتمة بى الناس ومهتمة بى الكراسى يعنى تحذيرات خارجية ولا مبالاة حكومية يعنى اكتر قلم هيفرقع فى تاريخ جمهورية امبابة المتحدة والعالم كله هيسمعه ؟؟؟
...........
كل سنة وانت طيبة عام سعيد واحلى احلام مع بداية العام وياااارب تكون خير عليكى ديما

غير معرف يقول...

انتى فين من كل الى حصل انا كنت منتظر تقولى كلامى اتحقق حتى وطالبك لتعديل الدستور ياااارب تكونى بخير ياارب طمنينى عليكى ومتخافيش مبقاش فى عيش وحلاوة ولا قسم اول خلاص اظهرى وبانى يابنت بلدى

قول ياااارب يقول...

thunder
الله يكرمك بجد على سؤالك انا بخير والله وبعدين عيش وحلاوة ايه انت عارف هو احنا بيهمنا بردوا ههههههه
لاء انا كويسه والله الحمد لله بس كنت بتفرج على اللى بيحصل قلت يمكن ليها اخر لكن مش باينلها اخر
ربنا يسترها ونعديها على خير
دايما منورانى بتعليقك وسؤالك وعموما اهو البوست نزل منتظره رايك