صباح الخير يااولاد عاملين ايه النهارده فى الجو الحار البرد ده ههههه مش عارفه ازاى بس هو كده وخلاص عموما انا خليت المدونه بتاعتى بحرى علشان الطراوة الواحد بيتخنق بسرعه ههههههههه وحاطه تكييف ومظبطاها.
انا بعد ماصليت الفجر كده زى الناس العاديين يعنى لقيت نفسى مصممه ان اكتب الموضوع ده
والله نفسى دى بقت بتطلب منى حاجات غريبه اوى هههههه ماعلينا نفسى بقى اعملها ايه
ومن هنا ومن ارض المدونات العربيه والعالميه برده مفيش مانع
تحدثكم سمسمه فى أولى حلقات برنامجها الشهير والمعروف على ارض الوطن العربى سمسمه والحياة
طبعا محدش سمع عن برنامجى ده؟ ههههههه بس على فكره هو اشهر من برنامج قلم رصاص بتاع حمدى قنديل
بس احنا اللى مش بنقول ههههههههه
المهم خلينا فى حلقتنا وبلاش نجيب فى سيرة حد احنا لسه مخلصين صلاة
زى ماانتم شايفين كده من اسم الموضوع حبيت اول حاجه اكتبها تكون لامى الحبيبه بصراحه هى ياماعملت لينا فقلت نعملها اى حاجه بقى ولو كانت بسيطه
فى يوم من الايام وانا قاعده كده مع جدو الله يرحمه فى قاعدة صفا والنفوس صافيه ههههههه اصل جدى ده كان اسطوره ده لو كان عاش كمان شويه كان دخل التاريخ من اوسع ابوابه ههههههههه لا وايه اكيد كان محمد حسنين هيكل كتب عنه بس يلا بقى ملوش نصيب ههههههه
المهم جدو حبيبى كان بيقول احيانا حاجات جميله اوى فكانت كلمته الشهيره اللى من غيرأم حاله يغم
وصدق جدو فى ده فعلا اللى من غير ام حاله مش يغم بس ده حاله نيله خاالص
انا عارفه انه مهما قلنا من كلام مش هيوفى حقوقها علينا بس نتمنى من ربنا يقدرنا ولو نرد جزء بسيط من افضالها
طبعا هو المفروض اللى بيستضيف حد فى برنامجه يكون عايش هههههههههههه بس الجديد بقى هنا انك تستضيف ميتين مفيش مشكله ههههههههه فاصل ونواصل...........
بعد الفاصل الفظييييع ده وكم الاعلانات الرخمه وحلقات عمو كرومبو اللى ملهاش حل ده
رجعتلكم مع احلى كلام لاحلى ام فى الدنيا اسمعوا كده
بخاف عليكى
ببات أفكر فيكى.....من خوفى وقلقى عليكى
بخاف لايجى اليوم.....ومقدرشى اشوف عينيكى
بخاف من الزمن والايام......لايبعدونى عن لمسة ايديكى
حلف النوم مايلمس جفونى.....من كتر خوفى وقلقلى عليكى
فأنتى حبى وهيامى....وأنتى نبضى وشريانى
احبك ياأمى يارمز الحنان والطيبه والامان
ياكل عمرى اللى عدى والا جاى
فسامحينى يااحلى حاجه فى عمرى
فانتى الهنا والدنا ياكل عمرى اللى عدى واللى جاى
طبعا خلصت انا كلامى
مستنيه تليفوناتكم بقى علشان البرنامج يبقى طبيعى زى اى برنامج هما يعنى احسن مننا فى ايه
عاوزه اشوف ارائكم على تليفون 0900 ده تليفون البرنامج 0900 وشيل اى حاجه من على العربيه هههههههه
واخر كلامى سلام
مع حلقه اخرى من برنامجكم سمسمه والحياه
انتظرونااااااااااااا؟ بقولكم ايه قبل ماامشى طبعا متنتظروش جمب النت لحد الاسبوع الجاى على ماتيجى الحلقه التانيه ابقوا قوموا شموا شويه هوا ههههههههههه
هناك 28 تعليقًا:
ربنا يخليها لينا ياااااارب
ومانتحرمش ولا اي حد يتحرم من مامته
ربنا يخليهالك ياسمسمه
ويرحم العظيم جدو ان شاء الله
السلام عليكم
الام هى اغلى شىْ فى الوجود
مهما قولنامش هنقدر نوصف حبنا ليها وفضلها علينا
بداية موفقة
منوره ياسمسمه
ربنا يارب يخلليلك مامتك بجد ياجماعه مامتها دي ست سكره تتحط علي الجرح يطيب بس سمسمه دايما مغلباها
اما بقي جدك ياسمسم ربنا يرحمه يارب
بس من امته وانتي بتعدي قعده صفا انتي وجدك هههههههههههههه يابنتي لو جدك كان عاش كمان سنه كان دخل التاريخ من اوسع ابوابه
وفي النهاية احب اهدي اغنية لسوف اعود يامي للامي الحبيه وللامهات المسلمين
وكمان ببلغ السلام لماما وبابا وعمو والعائله
وبهدي كمان باقة ورد احمر ليكي ياسمسم
يلا بقي وانتي رغايه كدا
جوجو
عندك حق والله مهما عملنا مش هنقدر نوفيها حقوقها
علشان كده بندعيلها ان تكون من اهل الجنه ومن الصالحين
وتركنا مكافأتها على ربنا
نورتى ياجوجو البيتوت بتاعى
صمت المشاعر
ايه يابنتى تعليقك الرائع ده بتحرجينى بزوقك
وبعدين انتى عارفه ماما بتحبك اد ايه ده كفايه بس البتنجان اللى بتاكليهولى
اما جدو الله يرحمه والله احيانا كان له قاعده صفا هههههه يلا الله يرحم موتانا المسلمين يارب
وميرسى يامانو على باقة الورد الجميله انتى عارفه منين ان بحب الورد؟
بس ياسلام بقى لو كان معاها شيكولاته جالكسى
كنت هحبك اكتر هههههههه
نورتينى يامانو
مونى الشريف
ربنا يخليكى يامونى يارب ومايحرمكيش من مامتك انتى كمان
وربنا يكرمك على دعوتك الجميله ياجميله
نورتينى يامونى
بجد بوست ملهوش حل
ربنا يخليهالك يارب
تحياتي
اولا اول زيارة ليا هنا واتمنى انى اكرره بازن الله اختى العزيزة فعلا احنا لو قدمنا عمرنا كله كلمة شكر لاهلنا لن نوافيهم جزء من صانعيهم واستماتتهم فى محاربة الحياة علشان ومحدش بيقدر دا الا لما بيفقد احدهم ربنا ما يكتبها على حد ويصبر كل اللى ذاق من مرارة الكاس المهم انك وصلتى فكرة حلوة اوى اتمنى جميعنا نستوعبها وحتى انا رغم ان البوست الجديد عندى قايل فيه دا اتمنى فعلا نعبر عنا حبنا لاهلنا دلوقتى مش نستنا وقت علشان دعاء
اختى العزيزة دمتِ بكل ود وبكل ما تحبى
زيارة اولى لى هنا
اولا مبروك على المدونة
ثانيا ربنا يرحم جميع اموات المسلمين جميعا
ثالثا عمرى ما توقعت انى هلاقى فواصل اعلانية حتى
هنا بصراحة الدماغ تعبت اوى من الاعلانات
رابعا وده الاهم
ممكن اعرف سعر الدقيقة حاكم اليومين دول
يقولك اتصل وبعد ما اتصل اعرف ان سعر الدقيقة
شىء وشويات
بس بجد ربنا يوفقك دايما يا رب
بخاف لايجى اليوم.....ومقدرشى اشوف عينيكى
الجملة دى لمستنى جدا
اى كلام يتقال عن الام لازم يطلع من القلب
ربنا يخليهالك ويخليك ليها
بس قوليلى مفيش ايميل للبرنامج
او رسايل عشان الرقم مشغول
هاهاهاهاهاهاها
تقبلبى مرورى
WhItE HeArT
ربنا يخليكى يارب لو كنتى بنت ويخليك لو كنت ولد
بجد نورتينى ونورت بيتى المتواضع ده وان شاء الله هزورك قريب فى بيتك شوفى بقى هضايفينى ازاى
thunder
الله يكرمك على كلامك الجميل والرائع بجد
وحقيقى نورتينى وفعلا احنا مهما عملنا مش هنقدر نوفى حقوق الاب والام علينا بس بدعى ربنا يقدرنا ونكون من الابناء الباريين
واتمنى تنورنى دايما بارائك الجميله واكيد هنقدم مشروبات ههههههههه
نورت مرة تانيه
اسماء واحلام فى وجدانى
ربنا يخليكى يارب ويرحم جميع موتانا يارب
اما موضوع الاعلانات ده حقيقى دماغنا مش ضربت ده هنجت من كترهم
اما الدقيقه هتبقى عندنا رخيصه شويه هنخليها بجنيه بس اهو احسن من جنيه ونص ولا ايه؟
نورتينى بجد
احساس طفلة محبة للرومانسية بس واقعية
نورتينى بجد وربنا يخليلك مامتك يارب ومتتحرميش منها ابدا يارب
اما موضوع الايميل ده هههههه هقوله بس متقليش لحد هههه
smsma@haya.net
هههههههههه
حته ايميل تحفه
نورتينى
عارفه
احلي حاجه واهم حد في الدنيا كلها هو مين
الام
والام اللي بجد
مفيش احلي من كده ربنا يخليها يارب
وميحرمش حد من ماته
كلامك حلو اوي
وصادق
ربنا يسعدك
اتمني تتقبلي زيارتي
منا خلاص زرتك تتقبلي بقي ولا متتقبليش ال يعني
(وش مطلع لسانه)
تحياتي
عندك حق ياسمكه احن قلب فى الدنيا واعز انسان فى الدنيا هى الام
وياستى انتى تنورينا فى اى وقت وربنا يكرمك على دعائك الجميل
نورتينى
ياعينى ياعينى نفسك دى فعلا بتطلب حاجات غريبه زى مثلا مثلا يوم شم النسيم........
وجدو طبعا عندو حق خصوصا لما بيطلع حاجات جميله زى دى
وطبعا الام مهما نعمل مش هنقدر نرد لها ولو جزء بسيط من اللى عملته معانا ويارب يرضوا عننا ديما ويطول فى عمرهم ويسامحونا على اى حاجه عملناها فى حقهم ويرضوا عننا ديما
تسلمى ياسمسمه
المدونة جمييييييييييلة
والبوست اكتر من هايل
لازم تنحط فى قائمة المدونات علشان اقدر اتابعها على طول
تحياتى ودى مش اخر زيارة
يااا
قالولى ان فى برنامج هنا اشهر من بتاع حمدي قنديل قومت جيت علطول :)
ربنا يخلى ماما ومامتك وكل المهمهات اللى فى الدنيا :)
ويرحم كل المهمهات اللى مش معانا ويصبر اولادهم يارب
اسلوبك لذيذ اوى ياقمر ماشاء الله :)
ربنا يخليهالك يارب
اجمل حاجة في البوست انك صليتي الفجر
بجد صلاة الفجر هي أجمل حاجة في الدنيا
فكرتيني بحاجة كنت كتبتها لوالدتي
ياأمي لو جنبك
للدنيا مش محتاج
وسفيتني هتكمل
وهتغلب الأمواج
لو شئ هيألمني
يبقى رضاكي علاج
ويعيش تراب جذمتك
فوق راسي أجمل تاج
طيب ايه رايك نشيل الجنيه ونخليه نصف جنيه
ويكون فضة
حاكم الواحد اليومين دول مش ملاحق على المحمول
والتليفون الارضى
احمد
صمت الحنين
منورانى دايما والله وبعدين اعمل ايه والله يوم شم النسيم ده كانت الفسحه فجأه ومكنتش عامله حسابى بس بينى وبينك انا ماصدقت كنت محتاجه تغيير الجو ده
اما الام مهما عملنا والله مش هنقدر نوفيها حقوقها بس يارب تكون مسامحنا على تصرفاتنا
نورتينى والله
اصحى يا مصر : اسلام ديو
ربنا يخليك على رأيك الجميل وشرف لينا ان حضرتك تكون من زوار بيت العز
نورت المدونه بجد
كفايـة طيبـة
هههههههه اه ماانا قلت ان برنامجى اشهر من بتاع حمدى قنديل بس محدش صدقنى
نورتينى بجد ويارب يخلى ويبارك فى عمر كل امهاتنا يارب ويرحم كل موتنانا امين يارب
محمود ابوالعزم
فعلا والله معاك حق احلى حاجه واجمل نعمه ربنا من علينا بيها هى صلاة الفجر
وكلام حضرتك جميل اوى اوى والام تستاهل مننا اكتر من كده بكتييير
نورت المدونه بجد وبدعوة حضرتك الجميله
وربنا يبارك فى امهاتنا يارب
اسماء واحلام فى وجدانى
ههههههه ده كده هنصرف على البرنامج من جيوبنا واكيد هنشهر افلاسناههههه
نورت واسفه مكنتش اعرف ان حضرتك ولد وكتبت بصيغة الانثى
احنا ممكن نخلى مكالمات البرنامج مجانا وخلاص والدوله تتولانا
طبعا مهمها نقول مش هنقدر نوفي الم حقها ولا نقدر نعوضها علي التعب والالم الي شفته في تربيتنا
ربنا يرحم ولدينا كما ربيانا صغيرا
تقبلي مروري
مجنووون
مـجـنـووون
يارب يرحمهم جميعا ويبارك لنا فى امهاتنا لان الام بجد اعظم مافى الوجود وحقيقى الواحد مش متخيل انه يعيش من غيرها
إرسال تعليق