سلام الله عليكم جميعا ياقوم
كيف حال الأوس والخزرج هل هما معنا ام علينا ههههههه
ايه الاخبار بعد تغيير التوقيت ؟ احلى حاجه فى مصر والحاجه الوحيده اللى فيها تغيير وكسر للروتين الممل تغيير التوقيت؟ ولا ايه رايكم؟
المهم نبدأ حلقتنا النهارده
أسعدالله مسائكم جمهور برنامجى الشهير سمسمه والحياه
والله موضوع النهارده انا حبيت اتكلم فيه لان متغاظه منه بشكل مش ممكن
الموضوع ومافيه ان المحاضره اللى فاتت بتاعتى اه نسيت اقولكم ان انا بعمل دبلومه فى القانون الجنائى ليه معرفش؟ عملت فيها عبدالستار صبرى وقلت لابد نكمل دراسات عليا وقد كان
المهم بقى محاضرتى كانت فى الحصانات؟ طبعا عارفين يعنى ايه حصانه
اللى لفت انتباهى كان مايسمى بالحصانه الدبلوماسيه طبعا مشاهدين البرنامج يحبوا يعرفوا تطلع ايه الحصانه الدبلوماسيه دى؟
ان رئيس الدوله الاجنبيه لو عندنا فى مصر مثلا بيكون له حصانه ضد اى جرائم يرتكبها وكمان ايه مش له لوحده ده كمان للاسره الكريمه والحاشيه ليه متسالوش؟
ويعلل ذلك بالمبدأ المعروف فى القانون الدولى انه ليس للمتساويين سلطان لاحدهم على الاخر
وهذه الحصانه ايضا يتمتع بها الممثل الدبلوماسى وكذلك اسرته
هقولكم مثال يعنى جورج بوش مثلا( عليه من الله مايستحق) لما كان رئيس دوله وجه عندنا مصر وضربت معاه كده ومزاجه طلب يقتل 5 مصريين مثلا عادى ولا حاجه ولا حد يقدر يعمله حاجه لانه عنده حصاااااااااانه؟
ده انا لو كنت رئيس جمهوريه وده مستحيل طبعا كنت اصدرت قرار باعدامه فى ميدان عام رميا بالصرم(الشوزات يعنى) ولو ان بوش اتعود على موضوع الشوز ده
خلاص احنا ممكن نبقى نعمل تركيبه ونرميها عليه مكونه من كلوريد صوديوم وفسفورابيض وغاز الميثان وحمض نيتريك بس خلى بالكم احسن تفرقع فى وشكم وانتوا بتعملوها هههههههه
ولو قالولكم انتوا استعملتوا مواد محظورة نقولهم محدش احسن من حد مااسرائيل استعملت الفسفور الابيض وماخدتناش منها لاحق ولا باطل
فااااااااااصل ونعووووود.....
...........
...............
أسعد الله مسائكم من جديد
احلى حاجه الفواصل دى هههههه حقيقى هترفعلنا الضغط قريب خدوا بالكم اصل الضغط ماشى اليومين دول فى البلد
المهم نكمل حلقتنا خلصنا من الحصانه الدبلوماسيه وندخل على الحصانه البرلمانيه كلنا طبعا نسمع ان العضو البرلمانى المحترم بيدخل مجلس الشعب علشان الحصانه
وحجة المشرع فى توفير الحصانه لعضو البرلمان هى انه يقدر يمارس عمله بحريه
عاوزه بس افهم منين المشرع يقولنا المواطنون امام القانون سواء ويرجع تانى يمنح البعض امتيازات
ايه التناقض الغريب ده
وفعلا صدق عادل امام لما قال فى فيلمه لاتناقش ولا تجادل يااخى على؟ هههههههه
هو مين على ده؟
انا عارفه حلقة النهارده كانت دسمه شويه بس حقيقى الموضوع يضايق اوى جدا خالص
يلا اشوفكم على خير ومنتظرة تليفوناتكم على رقم البرنامج او الرسايل عبر البريد الالكترونى
كانت معكم سمسمه من أمام الكمبيوتر قطاع الاتصالات قناة السويس هههههه قصدى قناة الساعه
هناك 31 تعليقًا:
تصدقي انا بكره الحصانه دي جدااااا
انا سمعت عن الحصانه البرلمانيه
لما كانوا عايزين يرفعوا قضيه ع شوبير طلبوا من النائب العام اسقاط الحصانه
حاجه غريبه جدا الناس بتاخدها فعلا زي ماقلتي عشان يمشوا امورهم ف البلد
حسبي الله ونعم الوكيل
و ع فكره عجبتني حكايه اعدامه بالمركب الكيميائي ده الي فيه الفوسفات الابيض :D:D
هههههه
شريره
عندك حق والله يأخت سمسمه حرام كده المفروض يبقى فى عدل بين المواطنين وكمان المفروض يبقى عقاب الناس دول اللى معاهم الحصنات اكبر من المواطنين العاديين لانهم يعتبروا مسئولين عن مصلحة البلد وكمان يعتبروا قدوه للمواطنين العاديين لان حصناتهم دى ممكن تشجع على الفساد فان كانوا هما ممكن يعملوا اى فساد من غير عقاب يبقى المواطنين هيعملوا ايه فكرتنى بمقوله كانت بتقول
ان كان رب البيت بالدف ضارب فشيمت أهل البيت الرقص
وكده البلد هتخرب اكتر ماهى
بس سيبك انتى حاو اوى العنوان ومتطابق تمام مع واقعنا لا تناقش ولا تجادل يا أخ على هههههههههه هو ده القانون اللى احنا ماشين به فى بلدنا
حلوا اوى حلقة النهارده ياسمسمه وكمان انتى منوره الشاشه النهارده والنور كان زياده اوى هههههه تسلمى ياسمسمه
MǿиY El-Shreef
ومين سمعك يامونى كلنا بنكره الحصانات ولا ليها اى لازمه وبقت بتستغل اسوء استغلال
اما عن التركيبه ههههههه ايه رايك فيها ماانا كان عندى كيمياء ثانويه عامه بس تركيبه جنان ههههه
نورتينى يامونى
صمت الحنين
والله ياصمت انتى اللى منورة وبجد تعليقك رائع وبخاصه موضوع رب البيت ده ههههه حقيقى حلو
وفعلا لما المسئولين يبقوا كده امال الشعب هيعمل ايه ده احنا كتر خيرنا والله هههههه
نورتينى ياحنه بجد
سمسمه
يعنى احنا مش دارسين قانون ومتغاظين اصلا لوحدنا من بعض الثغرات والتناقضات اللى بنسمع عنها
واتى جيتى كملتى علينا بالقانون الجميل دا
طيب يعنى بلدنا مستفادة اية منو اصلا هو مش دا الهدف اصلا البلد والشعب
دا محمد على ذات نفسة لما قتل المماليك وعمل حصار على مصر منها لنفسها كان حاطت قوانين مفيدة والبلد ازدهرت فى عصرة والناس كانت بتشتغل بالايجار بس كانوا مبسوطين ومفيش حق بيضيع يعنى كان فية هدف ووصل لية فعلا رغم الديكتاتورية
نيجى احنا فى عصر زى اللى احنا فية وديموقراطية وكل الكلام دا وقانونا يكون كدا لية لية حد يقولى لية ؟
ربنا يعينك على تحمل الضغط العالى دا لما احنا بنسنمع بس وحالنا كدا
تقبلى مرورى
انا معايا حصانة ولسة هدخل المدرسة كمان ههههههههههههههههههههه
لا قصدك بجد بتقولى بلد حصانات
ولا بوش كمان دا اهبل ويعملها انتى هتوزى الرجل يجى يتقله كام واحد الحمد لله انه خرج الهى مايرجع للحصانة تانى وربنا يوارينا فيه يوم يارب
المهم بوست حلو جدااا
جدااااااااا
اختى العزيزة دمت بكل ما تحبى وفى رعاية الله
عجبنى جدا فيكى عقليتك الفزه وتفكيرك واختيارك لى موضيعك بجد معجب جدا وموضوع الحصانه ده قصتو كبيره كنت عايذ اقولك تارخها بس مستعجل المهم هيه بتكون مفيده لينا فى حجات ولكن ضررها مبيكنش لينا احنا لطبقه تنيا خالص
مرسى لزيرتك واتمنى اتشرف بيكى فى كل موضيعى لئنى ت عليقك هيهمنى كتير
طبعا انا مش جاى احييكى على البوست خالص
انا جاى اهنيكى واقولك مليون مبروك انا شفت اسمك فى الجرنان النهاردة.
ههههههههههههههههه
اكيد اسمك فى الاسماء اللى انا قريتها " 133 "
مبروك
احساس طفلة محبة للرومانسية بس واقعية
اه والله ربنا يعينا احسن الضغط على الاخر
اما موضوع الديمقراطيه ده كبير جدا ان شاء الله نعمله بوست تانى علشان يجيلنا فيه السكر المره دى
وطبعا الحكومه تنتعش لما الشعب هيخلص من الامراض اللى هتجيله
منورانى بجد
thunder
ربنا يخليك بجد وفعلا بوش يعمل اكتر من كده وفعلا عليه من الله مايستحق
اهو انت فكرتنى بكلمة عادل امام بلد بتاعة شهادات صحيح ههههه
نورت بيت العز
ادم المصرى
ربنا يخليك على كلامك واحنا ناس عاديه خالص لسه موصلتش لموضوع العقليه الفزه دى
وياريت تبقى تتقولنا تاريخ الحصانات ده اكيد هنستفيد برده
نورت بيت العز
مسدس صغير
انا والله اول ماشفت تعليقك كنت هموت من الضحك
عموما انا لسه دفعة 2007 واللى صدرت قرار بتعينهم دول دفعة الجيد 2006
اما دفعتى لسه على شهر اكتوبر ان شاء الله ودعواتك لينا بقى
واكيد لما اسمى هينزل ان شاء الله هقولكم طبعا علشان تباركولى واظبط كل المدونيين واغرقهم ببسى بقى بس ربنا يستر ويعديها على خير
ونورت بيت العز
ههههههههه
انا لما قريت مع ايقاف التنفيذ فكرتك 2006.
ع العموم ملحوقة هاتى اسمك بس وملكيش دعوة.
ههههههههه
عقبالك
هههههههههههههه ماشى اوك هبعتلك اسمى على الفاكس ولو ان لو سالت اى حد عليا هتلاقى الكل عارف اسمى مش بقولكم اشهر من حمدى قنديل ههههههه
يلا حصل خير ودعواتكم ان ربنا يسهلها
ألو ألو
معاكي الحاج عبد الهادي من منيا القمح
أنا متابع حضرتك من زمان
وبحب برنامجك جوي جوي
وأحب أسأل إيه موضوع عبد الستار صبري ده ؟
هههههههه الحاج عبدالهادى مين؟
عموما منور البرنامج اما موضوع عبدالستار صبرى ده يطول شرحه هبقى اقوله بعدين
نورت بيت العز
ههههههههههههههههههههه
هجبنى اوى اسلوبك الجميل فى الحديث
بتتكلمى عن حاجة جد اوى وكمان تقيلةا وى بس باسلوب مبسط
تحياتى ليكى
معلش ما تزعليش
بكرة تبقى معاكى الحصانة وتموتى زى ما انتى عاوزة
صحيح انتى بتحضرى فى جامعة ايه؟
سلام عليكم
بجد مدونتك رائعة اخر حاجة
نرجع بقى للتوبيك اللى يجيب الضغط ودة مش جديد
والله الواحد وصل بيه الحا خلاص انه ساب كل حاجة للحصاانة الالهية ومحكمة رب العالمين اللى مستحيل ولا يمكن يكون فيها ظلم كله هايقف قدام ربنا وتفضح السرائر
ربنا يسترهااااااااااااا
بس بجد حاجة عايزة افهمها ايه اهمية الحصانة؟
لو واحد كويس ومش في نيته قتل ولا فساد هايعمل ايه بالحصانه
يمكن يجوز خايف حد يلبسه جزمة قصدي تهمة
اعتقد اللى يدور على الحصانه يبقى بيدور انه يلعب بديله زي البوبي كدا ويسرق وينهب ..بس هايروح فيين مسيره يقع
تقبلي مروري
دعاء مواجهات
ربنا يخليك والحمد لله ان البوست عجبك
ونورت بيت العز والله
رؤية
هههههههه لو حصانه من النوع ده مش عاوزاها
نورنتينى ياجميله وانا بعمل الدبلومه فى جامعة المنصورة
القمر الساهر
والله عندك حق المحكمه الالهيه الوحيده اللى مفيش فيها ظلم
اما موضوع البوبى ده فانتى لمستى كبد الموضوع والله ههههههه لان كلامك مظبوط جدا جدا
حقيقى نورتينى بتعليقك الجميل
الوووووو
ايوة يا استازة
انا باتصل بس عشان اقولك على بشرى هتفرحك
هي مش الحصانة ديت مرات الحصان؟؟؟
خلاص
اطمني انا سمعت ان فيه حالة انفلونزا الحصنة ظهرت في مصر
وقريب هاتخلص علي جنس الحصنة راجل وست
ولا تعكري دمك يا دكتورة
بس كان ليا سؤال
هو مش لولا الحصانة البرطمانية دي كان اللي يقتل الف ولا الفين مصري وهو مش قاصد كان منكن يعني يتاخد ظلم ومايلحقش يطلع يعمل عمرة في لندن
اتقوا الله بقى
كان معكم متشيحة حاتم اكاهرة
بوست جميل اوي ومعلوماتك عجبتني
وياريت تفيدينا بمعلومة في كبسولة كده دايما
يمكن نعمل دكتوراه من وراكي
ههههههه
تحياتي
اية التاخير دا وفين البوست الجديد
هو الاذاعة ميكروفناتها بتتصلح ولا اية
اتمنى تكونى بخير ان شاء الله والبوست الجديد ينزل
قريب ان شاء الله
دمتِ بكل حب وود وفى رعاية وحفظ الله دائما
فكرة من الزمن ده
هههههههههههه شكرا على اتصالك يااخت متشيحه عندك حق والله
بس كده حرام هنظلم الحصان معانا ليه ده اغلى من احنا نشبهه بالحصانه
وحلوة موضوع الكبسوله ده فكرنى ببرنامج اسمه كبسوله تربويه هههههه نحاول نطبقه مفيش مانع
ميرسى لاتصالك نورت الشاشه والله
thunder
ههههه لا وانت الصادق المذيعه مش فاضيه خالص وتقلت علينا بقى
ربنا يخليك على سؤالك بس معلشى والله الظروف احيانا بتبقى اقوى مننا وربنا يسهل واحاول اعمل موضوع جديد والله فيه موضوعات كتير بس الوقت مش سامح
بشكرك مرة تانيه على سؤال حضرتك
محاضرة جميلة كميلة كوى يا ابلة بس هو مين اونكل عبد الستار صبرى هو كريب لسمير صبرى؟
ولا يكونش ابن اخت خالة عم الراحل اسماعيل صبرى بتاع طرقت الباب حختى كل متنى
مدونتك جميلة بجد وعلى فكرة الدراسات العليا رغم انها متعبة وشاقة الا انها والله لذيذة وممتعة عن تجربة شخصية بقولك دا يكفى انك هطلعى منها كسبانة بكل المقاييس
تحياتى ونتواصل بود
هانى سعيد
منورنا والله بس مين بقى اسماعيل صبرى ده؟
شكلنا هنفضل نتكلم بالالغاز
وميرسى بجد على رايك فى المدونه اما موضوع الدراسات العليا ده طلع حاجه بجد مؤرفه جدا بس الحمد لله وربنا يعينا عليها
نورت البرنامج
العدالة معصوبة العينين وستظل كذلك مادام الميزانمقلوب فى بلادنا تقبلى مرورى
المهاجر
فعلا عندك حق والله بس المشكله انه هيفضل لحد امتى مقلوب امتى يتعدل بيبقى ميزان العدل والمساواه بجد
نورت البرنامج برايك الجميل
I think this is one of the most important information for me. And i am glad reading your article. But should remark on few general things, The website style is perfect, the articles is really nice
إرسال تعليق